پاکستان کی فلم اور ڈرامہ انڈسٹری کی مشہور اداکارہ ہانیہ عامر نے اپنا خفیہ سوشل میڈیا اکاؤنٹ کے متعلق اہم انکشاف کیا ہے جو انہوں نے ایک مختلف نام سے بنایا ہوا ہے۔

حال ہی میں ہانیہ عامر کامیڈین، اداکار اور میزبان احمد علی بٹ کے پوڈ کاسٹ پر نظر آئیں جہاں انہوں نے سوشل میڈیا ٹرولنگ، خفیہ اکاؤنٹس اور گلوکار عاصم اظہر کے ساتھ ماضی کے تعلقات پر تبادلہ خیال کیا۔

اس دوران احمد علی بٹ نے ہانیہ عامر سے پوچھا، “ماضی میں، آپ نے اپنے تعلقات کو بہت عام کیا تھا۔ کیا آپ کو نہیں لگتا کہ آپ نے لوگوں کو آپ پر تنقید کرنے کا موقع دیا؟”

اس سوال کے جواب میں ہانیہ عامر نے عاصم اظہر کا نام لیے بغیر اپنے ماضی کے بارے میں بات کرتے ہوئے کہا کہ ’میرے ماضی کے لمحات بہت اچھے تھے، لیکن مجھے اس رشتے میں کچھ مشکلات کا سامنا بھی کرنا پڑا تھا اور میں نے مشکل وقت بھی دیکھا ۔

ہانیہ عامر نے کہا کہ میں ماضی میں بہت خوش تھی، ہر کام دل سے کرتی تھی اور اس وقت میری سمجھ بھی کم تھی لیکن اب، میں سمجھدار ہو گئی ہوں، اور میں لوگوں کے مشوروں پر عمل کرتی ہوں۔”

ساتھ ہی اپنے خفیہ اکاؤنٹ کے بارے میں بات کرتے ہوئے اداکارہ کا کہنا تھا کہ ‘میں نے بھی سوشل میڈیا پر جعلی نام سے ایک خفیہ اکاؤنٹ بنایا تھا اور میرے مداح اس اکاؤنٹ پر مجھے فالو کرتے تھے۔’

انہوں نے کہا کہ میں سب سے پہلے اپنی تصاویر اپنے خفیہ اکاؤنٹ پر پوسٹ کرتی ہوں۔ پھر، مداحوں کے مشورے پر عمل کرنے کے بعد، میں اپنے آفیشل اکاؤنٹ پر تصویر یا ویڈیو اپ لوڈ کرتی ہوں۔

سوشل میڈیا ٹرولنگ کے حوالے سے اداکارہ نے کہا کہ میں صارفین کی تنقید پر توجہ نہیں دیتی، میں صرف اپنے دوستوں اور خاندان پر توجہ دیتی ہوں کیونکہ ماضی میں ہونے والے کچھ تنازعات نے میری ذہنی صحت پر گہرا اثر ڈالا تھا۔

انہوں نے مزید کہا کہ ماضی کے تنازعات کی وجہ سے جہاں بھی مجھے تنقید کا سامنا کرنا پڑا، ان تنقیدوں نے مجھے ایک بہتر انسان بھی بنایا ہے۔

خیال رہے کہ ہانیہ عامر اور گلوکار عاصم اظہر کے درمیان ماضی میں گہرے تعلقات تھے۔ دونوں میں علیحدگی ہوگئی اور عاصم اظہر نے اداکارہ میراب علی سے منگنی کرلی۔