بالی ووڈ فلم انڈسٹری کے معروف فلمساز کرن جوہر نے ہالی ووڈ فلمیں نہ بنانے کی وجہ بتادی ہے۔

حال ہی میں عالمی ایوارڈ وصول کرتے ہوئے کرن جوہر نے بتایا کہ ماضی میں انہوں نے ہالی ووڈ فلم بنانے کے لیے امریکا کے متعدد دورے کیے لیکن ان کا کوئی نتیجہ نہیں نکلا، کیونکہ وہ اپنی مادری زبان کے علاوہ دوسری زبان میں فلم نہیں بنانا چاہتے تھے۔

انہوں نے کہا کہ حیران کن طور پر جب 2012 میں انہوں نے عالیہ بھٹ کو ’اسٹوڈنٹ آف دی ایئر‘ میں کاسٹ کیا تھا تب ان پر اقربا پروری کا الزام نہیں لگا لیکن فلم کی ریلیز کے کئی سال بعد اب ان پر اقربا پروری کے الزام لگائے جا رہے ہیں۔

ان کا کہنا تھا کہ انہوں نے عالیہ بھٹ کو کاسٹ کرتے وقت یہ نہیں سوچا تھا کہ ان کے والد کون ہیں اور والدہ کیا کرتی ہیں؟

کرن جوہر کے مطابق پوری دنیا میں بالی ووڈ فلموں سے متعلق غلط تصور پایا جاتا ہے، ہالی ووڈ والے سوچتے ہیں کہ بالی ووڈ فلمیں صرف ناچ اور گانے پر مبنی ہوتی ہیں لیکن ایسا نہیں۔

انہوں نے کہا کہ یہ بلکل حقیقت ہے کہ بھارت میں گانوں اور ڈانس فلموں کو پسند کیا جاتا ہے لیکن ایسا بلکل نہیں کہ بالی ووڈ میں کہانیوں اور موضوعات پر فلمیں نہیں بنتیں۔

ان کا کہنا تھا کہ انہیں عالمی شہرت حاصل کرنے یا ایوارڈ حاصل کرنے کے لیے انگریزی زبان میں فلم بنانے کی ضرورت نہیں۔

معروف فلمساز کرن جوہر نے مزید کہا کہ وہ چاہتے ہیں کہ انہیں آسکر ملے اور وہ آسکر کے ریڈ کارپٹ پر بھی گھومیں لیکن وہ ایوارڈ انہیں انگریزی نہیں بلکہ اپنی مادری زبان کی فلم پر ملے۔