پاکستان شوبزانڈسٹری کی نامور اداکارہ ماوراحسین کپل شرما اور سنیل گروور کی صلح پر کافی’خوش‘ نظر آرہی ہیں۔

 ماورا حسین نے سوشل میڈیا پر مقبول ترین بھارتی کامیڈین کپل شرما اور ان کے پروگرام کے پرانے ساتھی سنیل گروور کے ایک بار پھر ساتھ کام  کرنے پران کے لئے نیک خواہشات کا اظہار کیا ہے۔

بھارتی میڈیا رپورٹس کے مطابق کامیڈین و اداکار کپل شرما کی ساتھی اداکار سنیل گروور سے 6 سال بعد دوستی ہوگئی ہے، دونوں اب نیٹ فلکس پر آنے والے کامیڈی شو میں پھر سے ایک ساتھ نظر آئیں گے۔

کپل شرما نے سنیل گروور اور دیگر کاسٹ کے ساتھ اپنے شو کی تشہیری ویڈیو انسٹاگرام پر شیئر کی ہے۔

ویڈیو کے کیپشن میں انہوں نے لکھا کہ دل تھام کر رکھیے، جس گھڑی کا انتظار تھا وہ آگئی، کپل شرما اور سنیل گروور بہت جلد نیٹ فلکس پر ایک ساتھ واپس آرہے ہیں۔

ماورا حسین نے سوشل میڈیا پر انہیں خوش آمدید کہتے ہوئے لکھا کہ اب وہ مزید ان کے پروگرام اور بے تحاشا قہقہے لگانے کےلئے انتظار نہیں کر سکتی۔

واضح رہے کہ کپل شرما اور سنیل گروور کے درمیان 2017 میں آسٹریلیا سے بھارت واپسی پر دوران پرواز جھگڑا ہوا تھا۔

کپل شرما نے مبینہ طور پر سنیل گروور سے نا صرف ہاتھا پائی کی تھی بلکہ غیر مناسب الفاظ بھی بولی  تھیں جس کے بعد سنیل گروور نے ’’دی کپل شرما شو‘‘ چھوڑ دیا تھا۔