44 سالہ فلمساز سرمد کھوسٹ نے اپنی 2022 کی فلم ’کملی‘ کیلئے ڈی سی ساؤتھ ایشین فلم فیسٹیول میں بہترین ہدایت کار کا ایوارڈ حاصل کیا ہے۔

سرمد کھوسٹ نے انسٹاگرام پر عالمی سطح پر بہترین ہدایت کار کےایوارڈ کی تصویر شیئر کرتے ہوئے اس خوشخبری کی تصدیق کی۔

سرمد کھوسٹ کی اس پوسٹ پر متعدد شوبز شخصیات اور صارفین انہیں کمنٹس کرکے اس کامیابی پر مبارک باد دے رہے ہیں۔

ڈی سی ساؤتھ ایشین فلم فیسٹیول کا انعقاد ہرسال امریکا میں کیا جاتاہے، جوکہ ایک مشہور سالانہ ثقافتی پروگرام ہے، جس میں ہندوستان، پاکستان، افغانستان، بنگلہ دیش، نیپال، بھوٹان، تبت اور سری لنکا سے فلموں کو عالمی مقابلے کے لئے پیش کیا جاتا ہے۔

صبا قمر، ثانیہ سعید اور نمرہ بچہ کی کاسٹ پر مبنی اس فلم ’کملی‘ کو جون 2022 میں ریلیز کیا گیا تھا۔

اس فلم کی کہانی حنا ( صبا قمر) نامی ایک لڑکی کے گرد گھومتی ہے جو ایک بے نام وادی کے گھر میں اپنی اندھی نند سکینہ کے ساتھ بظاہر عام سی زندگی گزار رہی ہے۔

آٹھ سال پہلے حنا ( صبا قمر) کا شوہر روزگار کی تلاش میں ملک سے باہر گیا اور پھر کبھی واپس نہیں آیا اور نہ ہی اس نے اپنی بہن یا بیوی سے کوئی رابطہ کیا۔

ان حالات میں حنا کی ملاقات اس وادی میں آئے ایک مسافر سے ہوتی ہے اور ان دونوں کو ایک دوسرے سے محبت ہو جاتی ہے۔

تاہم، یہ پہلا موقع نہیں ہے جب اس فلم اور اس کی کاسٹ نے عالمی سطح پر تعریفیں سمیٹیں ہوں، رواں سال نومبر میں، کملی نے انٹرنیشنل فلم فیسٹیول میں تین باوقار ایوارڈز حاصل کرتے ہوئے ایک تاریخی سنگ میل عبور کیا تھا۔

صبا قمر نے بہترین اداکارہ، سرمدکھوسٹ نے بہترین ہدایت کار کا ایوارڈ حاصل کیا اور فلم کو بیلاروس کے سب سے بڑے فلم فیسٹیول کے معروف لسٹا پیڈ فیسٹیول میں ناظرین کی پسند کا ایوارڈ ملا۔