بالی ووڈ کے معروف ہدایت کار روہت شیٹی اس وقت اپنی ویب سیریز ’انڈین پولیس فورس‘ کی ریلیز کے لیے تیار ہیں جس میں سدھارتھ ملہوترا، شلپا شیٹی اور وویک اوبرائے اہم کردار ادا کریں گے۔

اس کے علاوہ سنگھم اگین کی شوٹنگ میں بھی مصروف ہیں جو کہ رواں سال ریلیز کی جائیگی۔

ایکشن سے بھرپور فلموں کے علاوہ روہت شیٹی کی کامیڈی فلم  گول مال بھی باکس آفس پر بڑی ہٹ ثابت ہوئی ہے جس کے سیکوئلز بھی بن چکے ہیں۔

اس حوالے سے جاری ہونے والی ایک رپورٹ میں بتایا گیا ہے کہ ہدایتکار نے گول مال فلم کے اگلے سیکوئل کے متعلق اپنی رضامندی ظاہر کردی ہے۔

اس حوالے سے بات کرتے ہوئے روہت شیٹی کا کہنا تھا کہ گول مال 5 یقینی طور پر ہوگی اور مجھے اسے تھوڑا جلد بنانا پڑے گا اور مجھے لگتا ہے کہ یہ سیکوئل باقی فلموں سے زیادہ شاندار ہوگی۔

انہوں نے مزید کہا کہ یہ ایک کامیڈی فلم ہے جس میں ایکشن نہیں ڈالا جاسکتا ہے لیکن اگلی گول مال فلم بڑی اور بہتر ہونی چاہیے۔

اس کے علاوہ روہت شیٹی نے ایک ایسی فلم بنانے کی بھی خواہش کا اظہار کیا جو کہ پولیس یونیورس سے متعلق نہ ہو اور ’چنئی ایکسپریس‘ کا حوالہ دیتے ہوئے کہا کہ اگر کوئی اچھی اور شاندار کہانی ملی تو میں ایک نئی فلم ضرور بناؤں گا۔

خیال رہے کہ ان کی آنے والی سیریز، انڈین پولیس فورس، 19 جنوری کو ایمیزون پرائم پر ریلیز ہونے والی ہے جو کہ ان کا او ٹی ٹی ڈیبیو بھی ہوگا۔ انڈین پولیس فورس میں شویتا تیواری، نکیتن دھیر، رتوراج سنگھ، مکیش رشی اور للت پریمو بھی اہم کرداروں میں نظر آئیں گے۔