عالمی شہرت یافتہ معروف پاکستانی گلوکار راحت فتح علی نے کہا ہے کہ مجھے کوئی مینجمنٹ آگے لے کر نہیں گئی، میرا فن ہی مجھے شہرت کی بلندیوں پر لے کر گیا۔

حال ہی میں گلوکار راحت فتح علی نے اپنی رہائش گاہ پر میڈیا سے گفتگو کرتے ہوئے کہا کہ میری سابقہ مینجمنٹ کو ختم کردیا گیا ہے، اب ہمارے راستے جُدا ہیں۔

انہوں نے کہا کہ اب میری بیگم انتظامی امور کی سربراہ ہوں گی، نئے سال میں میرے دستخطوں کے ساتھ معاہدے ہوں گے۔

ان کا کہنا تھا کہ ہمارے کسی بھی شوز کے حوالے سے میری نئی مینجمنٹ سے رابطہ کریں، اب میرے دستخطوں کے ساتھ معاہدے ہوں گے۔

گلوکار راحت فتح علی نے کہا کہ فروری سے ورلڈ ٹور شروع کر رہا ہوں، جنوبی افریقہ سے اس کا آغاز کروں گا۔

انہوں نے کہا کہ مجھے کوئی مینجمنٹ آگے لے کر نہیں گئی، میرا فن ہی مجھے شہرت کی بلندیوں پر لے کر گیا، میرا فن مجھے ہالی ووڈ، یو این او اور بین الاقوامی جامعات تک لے کر گیا۔

عالمی شہرت یافتہ معروف پاکستانی گلوکار راحت فتح علی کا مزید کہنا تھا کہ ہر سیاسی پارٹی کے لیے نغمہ گاؤں گا، بھارت کے ساتھ ثقافتی تعلقات بحال ہونے چاہئیں۔