بالی وڈ کی اداکارہ اور ماڈل ریا چکروتی نے انکشاف کیا ہے کہ جیل سے ضمانت ملنے کے بعد انہوں نے وہاں موجود قیدی خواتین کےلیے ’ناگن ڈانس‘ کیا تھا۔

آنجہانی اداکارسوشانت سنگھ نے 14 جون 2020 کو اپنے فلیٹ میں خود کشی کی تھی ، جس کے بعد پولیس نے اداکار کے اہل خانہ کی درخواست پر ریا چکروتی کو بھی شامل تفتیش کیا ، جوکہ اس وقت ان کی گرل فرینڈ تھیں، تاہم کئی ماہ جیل میں قید رہنے کے بعد ان پر قتل کا الزام ثابت نہیں ہو سکا۔

اپنے حالیہ انٹرویو میں اداکارہ ریا چکروتی نے بتایاکہ انہوں نے اپنی جیل کی دوستوں سے وعدہ کیا تھا کہ ضمانت ملنے کے بعد وہ ان کے لیے ناگن ڈانس کریں گی، وہاں موجود خواتین حیرانی سے پوچھتی تھیں کہ ’آپ ہیروئن ہو؟ آپ ڈانس کرکے دکھاؤ‘۔

انہوں نے بتایاکہ وہ غمزدہ تھی کیونکہ ان کی ضمانت ہوگئی تھی لیکن ان کے بھائی کی ضمانت نہیں ہوئی تھی۔

جیلر میرے پاس آیا اور کہا کہ میں انہیں (جیل میں موجود خواتین کو) کہہ چکا ہوں کہ آپ ڈانس نہیں کرسکتیں پر میں نے جیلر سے کہا کہ میں ان کے لیے ڈانس کرنا چاہتی ہوں کیونکہ دوبارہ کب میں انہیں دیکھوں گی؟

اداکارہ نے بتایا کہ میں نے سوچا کہ ان کے اتنے مشکل وقت میں شاید کچھ خوشیاں انہیں دے سکوں لہٰذا میں نے ان کے لیے ڈانس کیا، وہ ناگن ڈانس تھا اور وہاں موجود تمام قیدیوں نے بھی میرے ساتھ ڈانس کیا اور وہ تمام بہت خوش ہوئیں۔

واضح رہےکہ آنجہانی اداکارسوشانت سنگھ کی موت کے کیس میں بھارتی پولیس طویل عرصہ شواہد اکٹھے کرتی رہی مگر حتمی نتیجہ نہ نکلا۔

ناقص تفتیش پر کیس بھارتی تحقیقاتی ادارے، سی بی آئی کے حوالے کیا گیا تھا جس کی معاونت کرتے ہوئے آل انڈیاانسٹی ٹیوٹ آف میڈیکل سائنسز کی فرانزک ٹیم نے بتایا کہ سوشانت کے جسم پر کسی زخم کا نشان نہیں تھا نہ ہی ان کے جسم میں شراب کی موجودگی کے شواہد ملے۔

پولیس کو ان کی رہائش گاہ سے ان کے علاج و معالجے کے دستاویزات ملے تھے جس سے اندازہ لگایا گیا کہ وہ ڈپریشن کا علاج کروا رہے تھے۔

اداکار کے قریبی دوستوں کے ذرائع کا کہنا تھا کہ وہ گزشتہ چند ماہ سے ڈپریشن اور ذہنی دباؤ کا شکار تھے، تاہم ان کی پریشانی میں کورونا کے باعث لاک ڈاؤن ہونے کے باعث اضافہ ہوا۔