پاکستان شوبز انڈسٹری کے نوجوان گلوکار، سونگ رائٹر اور کمپوزر کیفی خلیل نے اپنے مداحوں کو ایک خوشخبری سنا کر ان کی بے تابی میں اضافہ کر دیا ہے۔

“کوک اسٹوڈیو سیزن 14” میں بلوچی گانے ’کنا یاری‘ اور پھر ’کہانی سنو ‘ سے پاکستان کے ساتھ ساتھ بھارت میں بھی رات ورات شہرت کی بلندیوں کو چھونے والے گلوکار کیفی خلیل نے اپنے نئے گانے کا اعلان کیا، جس کے بعد صارفین کی اکثریت نے اسے سال 2024 کا ہٹ گانا قرار دے دیا ہے۔

سوشل میڈیا کے صارفین کی اکثریت کا کہنا ہے کہ اس نئے گانے ’جرمانہ‘ کا ٹیزر سننے کے بعد ہی انہیں اندازہ ہو گیا ہے یہ گانا بھی ان کے دیگر گانوں کی طرح سپر ہٹ ہو گا۔

گلوکار نے انسٹاگرام پر اپنے اس نئے گانے کا ایک کلپ شئیر کرتے ہوئے کیپشن میں لکھا کہ ’میرا نیا سنگل گانا ’جرمانہ’ 12 جنوری کو ریلیز ہونے جا رہا ہے‘۔

یہ بھی پڑھیں:  کیفی خلیل کے گانے ’کہانی سنو ‘ نے عالمی اعزاز حاصل کرلیا

واضح رہے کہ ان کے گانے ’کہانی سنو‘ نے دنیا بھر میں مقبولیت کے ریکارڈ قائم کیے، کئی شہرت یافتہ گلوکاروں نے بھی اس گیت کو اپنی آواز میں گایا۔

کراچی کے علاقے لیاری سے تعلق رکھنے والے کیفی خلیل نے “کوک اسٹوڈیو سیزن 14” میں بلوچی زبان کا گانا “کنا یاری” گاکر خوب داد سمیٹی ، جس کے بول بھی انہوں نے خود لکھے تھے۔

اس کے بعد ان کا ایک اور گانا “کہانی سنو” توجہ کا مرکز بن گیا ، جو انہوں نے ابتدائی طور پر 2021 میں ریلیز کیا تھا، اس کے بعد کیفی خلیل نے اسی گانے کو نئے انداز میں جون 2022 میں بھی ریلیز کیا جسے مداحوں نے بےحد پسند کیا۔

گزشتہ سال پاکستانی معروف گلوکارہ آئمہ بیگ نے بھی”کہانی سنو” گانے کا فی میل ورژن ریلیز کیا تھا۔