کمال آر خان عرف کے آر کے، جو کہ معروف بھارتی فلمی ناقد کے طور پر جانے جاتے ہیں، نے فلم فائٹر کے متعلق اپنی رائے کا اظہار کیا ہے۔

حال ہی میں بالی ووڈ کی انتہائی متوقع فلم ’فائٹر‘ کا 03 منٹ طویل ٹریلر جاری کیا گیا ہے جس میں بطور مرکزی کردار اداکار ہریتک روشن، اداکارہ دیپیکا پڈوکون، اور انیل کپور شامل ہیں۔

جہاں متعدد پاکستانی مشہور شخصیات نے فلم کے واضح پاکستان مخالف بیانیے پر عدم اطمینان کا اظہار کیا وہیں کے آر کے نے بھی اسی پر اپنے خیالات کا اظہار کیا ہے۔

انہوں نے کہا کہ ایسی فلموں کے ذریعے پروڈیوسرز کی جانب سے حب الوطنی کے نام پر جذبات کا استحصال کیا جا رہا ہے، پاک بھارت جنگ کی داستان دکھا رہے ہیں جو کہ بیوقوفی ہے۔

حب الوطنی سے بھرپور تمام بالی ووڈ فلموں میں پاکستان کو مستقل ہدف بنائے جانے کے خیال پر سوال اٹھاتے ہوئے، کے آر کے نے سوال کیا، “میں یہ سمجھنے میں ناکام ہوں کہ ہر فلم میں صرف پاکستان پر ہی بمباری کیوں کی جاتی ہے، کیوں چین کے ساتھ ایسا کرنے کی کوشش نہیں کی جاتی ہے۔

انہوں نے مزید کہا کہ کیونکہ  بھارت کا چین سے بھی اتنا ہی جھگڑا ہے جتنا پاکستان سے ہے تو ہر بار صرف پاکستان کو ہی نشانہ کیوں بناییا جاتا ہے؟

انہوں نے اپنی بات جاری رکھتے ہوئے کہا کہ جیسا کہ بالی ووڈ کی ہر دوسری فلم میں دکھایا گیا ہے کہ افسروں کا ٹولہ پورے پاکستان کو تباہ کر دیتا ہے تو پھر بھارت کی سلامتی کے لیے دفاعی بجٹ اور ہتھیاروں پر کروڑوں خرچ کرنے کا کیا فائدہ ہے۔

اپنی رائے کا اختتام کرتے ہوئے، انہوں نے سوال کیا کہ اگر پاکستان کو بالی ووڈ کے ہیروز نے متعدد بار تباہ کیا ہے، تو پھر ہر دوسری فلم میں یہ ملک واپس کیسے آتا ہے۔