حدیقہ کیانی پاکستان شوبز انڈسٹری کی مقبول گلوگارہ ، اداکارہ ،گیت نگاراور سماجی کارکن ہیں۔

انہوں نے ناصرف متعدد مقامی و بین الاقوامی ایوارڈ اپنے نام کیے ہیں بلکہ دنیا کے بہترین معزز مقامات پر پرفارم بھی کیا ہے جن میں رائل البرٹ ہال اور کینیڈی سنٹر شامل ہیں۔

2006 میں حدیقہ کیانی نے پاکستان کا چوتھا بڑا شہری اعزاز تمغہ امتیاز اپنی موسیقی کی بہترین خدمات کے صلے میں حاصل کیا۔

2010 میں انہیں اقوام متحدہ ڈویلپمنٹ پروگرام کی گڈول سفیر بنایا گیا ، جس کے بعد وہ پاکستان کی اقوام متحدہ میں پہلی گڈول سفیر بن گئیں۔

گزشتہ روز حدیقہ کیانی نے انسٹاگرام پر اپنی تصاویر پوسٹ کیں ، جن میں دیکھا جا سکتا ہےکہ وہ پاکستان کے خوبصورت مقام ’اسکردو‘ میں ہیں۔

اس پوسٹ کی قابل ذکر بات یہ ہے کہ انہوں نے جو کیپشن دیا اس کے بعد ان کے لاکھوں مداح کشمکش میں مبتلا ہو گئے۔

حدیقہ کیانی نے پوسٹ کے کیپشن میں لکھا کہ’کسی خاص چیز پر کام کررہی ہوں’۔

اس سے قبل حدیقہ کیانی نے انسٹاگرام پر ایک ویڈیو پوسٹ کی، جس میں دیکھا جا سکتا ہے کہ وہ عاطف اسلم کے ساتھ دبئی میں ایک کنسرٹ میں موجود ہیں اور دونوں مل کر 12 سال قبل ریلیز ہونے والی پاکستانی فلم ‘بول’ کا مقبول ترین گانا ‘ہونا تھا پیار’ گا کر اپنی جادوئی آواز کا جادو جگارہے ہیں۔

سوشل میڈیا کے ذریعے دنیا بھر میں موجود ان دونوں نامور گلوکاروں کے مداح اس زبردست پرفارمنس کو دیکھ کر خوش ہو گئے ہیں اور یہ کلپ کافی وائرل بھی ہو گیا ہے۔

واضح رہے کہ یہ گانا ‘ہونا تھا پیار’ کامیاب ترین پاکستانی فلمساز شعیب منصور کی سپر ہٹ فلم ‘بول’ کا ہے، جسے حدیقہ کیانی اور عاطف اسلم نے گایا تھا۔

اس فلم کی مرکزی کاسٹ میں ماہرہ خان، حمیمہ ملک ، عاطف اسلم اور ایمان علی شامل تھے۔