پاکستان شوبز انڈسٹری کی بھرتی ہوئی اداکارہ مومنہ اقبال نے نہایت کم عرصے میں اپنی خوبصورتی، معصومانہ انداز اور اداکاری سے سب کو متاثر کرلیا ہے۔

مومنہ اقبال نے کئی ٹی وی ڈراموں میں مرکزی کردار ادا کیا ہے، ان کے معروف ڈراموں میں ’احسان فراموش‘، ’سمجھوتا‘، ’میرے ہم نشین‘ اور دیگر شامل ہیں۔

اداکارہ کا خاندان کشمیری نژاد ہے لیکن ان کی پیدائش اور پرورش لاہور میں ہوئی۔

مومنہ اقبال کے مطابق انہوں نے گھر والوں سے چھپ کر خاموشی سے ماڈلنگ شروع کی، جس پر ان کے اہل خانہ ناراض بھی ہوئے لیکن پھر انہوں نے سب کی منتیں کرکے منا ہی لیا۔

سوشل میڈیا پر مومنہ اقبال کی کئی تصاویر وائرل ہو رہی ہیں ، جن میں مداحوں نے انہیں ہالی وڈ کی نامور اداکارہ کیٹ ونسلیٹ سے مشابہ قرارد یا ہے۔

 47 سالہ کیٹ ونسلیٹ نے 1997 کی شہر آفاق ہالی ووڈ فلم ’ٹائی ٹینک‘ میں مرکزی کردار ادا کیا تھا جو نا صرف ان کی وجہ شہرت بنا بلکہ انہیں آج بھی لاکھوں مداح اس فلم کے نام ’روز‘ سے یاد کرتے اور پکارتے ہیں۔

 ڈائریکٹر جیمز کیمرون کی ہدایت کاری میں بننے والی فلم ٹائی ٹینک اس زمانے میں سب سے زیادہ بزنس کرنے والی فلم ثابت ہوئی اور کئی عالمی ایوارڈ اپنے نام کیے۔

انٹرنیٹ پر وائرل اس پوسٹ پر سوشل میڈیا صارفین کی جانب سے ملے جلے تبصروں اور ردعمل کا اظہار کیا جا رہا ہے۔