پاکستان شوبز انڈسٹری کے معروف اداکار و میزبان فیصل قریشی نے کہا ہے کہ پاکستانی فلموں کی کم کمائی کا بڑا سبب ٹکٹس مہنگے ہونا ہے۔

حال ہی میں اپنے دیے گئے ایک انٹرویو میں اداکار فیصل قریشی نے کہا کہ انہوں نے کسی کے دباؤ میں آکر پاکستان میں بھارتی فلموں کی نمائش کی بات نہیں کی تھی بلکہ انہوں نے حقیقت بیان کی تھی۔

انہوں نے کہا کہ ہمیں یہ تسلیم کرنا چاہئیے کہ ہمارے لوگ شوق سے ہندوستانی فلمیں دیکھتے ہیں اور ان کے گانوں پر ناچتے ہیں۔

ان کا کہنا تھا کہ بھارتی فلموں اور پاکستانی فلموں میں انٹرٹینمنٹ کی سطح کا فرق ہوتا ہے، جس وجہ سے ہندوستانی فلمیں مقبول ہوتی ہیں۔

فیصل قریشی نے کہا کہ 2019 سے قبل جب بھارتی فلمیں پاکستانی سینماؤں میں لگتی تھیں، تب کی پاکستانی فلموں کی کمائی کا موازنہ آج کی پاکستانی فلموں کی کمائی سے کریں تو بات سمجھ جائیں گے۔

اداکار نے کہا کہ پاکستانی فلموں کی کم کمائی کا ایک بڑا سبب یہاں کے ٹکٹس مہنگے ہونا بھی ہے، جب کہ 200 سے 250 ٹکٹ ہوگا تو ہر کوئی شوق سے فلم دیکھے گا لیکن جب ٹکٹ 1200 سے شروع ہوگا تو وہ شخص چاہے گا کہ جتنے پیسے خرچ کر رہا ہوں، فلم بھی ایسی ہی ہو۔

فیصل قریشی کا مزید کہنا تھا کہ اگر سینما کا ٹکٹ 200 ہوگا تو کوئی بھی شخص یہ شکوہ نہیں کرے گا کہ اس نے زیادہ پیسے خرچ کیے ہیں، اس لیے اسے فلم بھی اتنی ہی اچھی چاہیے۔