کارتک آریان، جو کہ بالی ووڈ انڈسٹری کے معروف اور باصلاحیت اداکار ہیں کی اگلی فلم ’چندو چیمپئن‘ کے حوالے سے ان کے مداح کافی پرجوش ہیں ۔

اس فلم میں کارتک آریان مرکزی کردار میں نظر آئیں گے جس کی ہدایتکاری کبیر خان  نے کی ہے اور یہ ان دونوں کا پہلا تعاون بھی ہے۔

اس فلم کے پروڈیوسر ساجد ناڈیاڈوالا نے کبیر خان اور کارتک آریان کے ساتھ ایک تصویر شیئر کی ہے اور تصدیق کی ہے کہ ریلیز کی تاریخ میں کوئی تبدیلی نہیں کی گئی ہے۔

‘چندو چیمپئن’ کے پروڈیوسر نے ہدایت کار اور اداکار کے ساتھ ایک تصویر انسٹاگرام پر شیئر کرتے ہوئے انکشاف کیا کہ فلم کی ریلیز کی تاریخ میں کوئی تبدیلی نہیں کی گئی ہے۔

تصویر شیئر کرتے ہوئے ساجد نے اس کے کیپشن میں لکھا کہ’’ سال کی سب سے بڑی فلم میں سے ایک کے لیے خود کو تیار رکھیں جس کی شوٹنگ مکمل ہوچکی ہے۔‘‘

اس سے قبل گزشتہ سال سال، کارتک نے فلم کا پہلا لک پوسٹر شیئر کیا تھا اور ساتھ ہی اس فلم ریلیز کی تاریخ کا انکشاف بھی کیا تھا۔

خیال رہے کہ اداکار نے اس فلم میں اپنے لک کے لئے بہت محنت کی ہے یہاں تک کہ انہوں نے ایک سال تک شکر کا استعمال بھی ترک کیا ہوا تھا۔ جس کا انکشاف 31 جنوری فلم کی شوٹنگ مکمل ہونے پر ہوا۔