عالمی شہرت کے حامل ارب پتی برطانوی اداکار ڈینی لیمبو نے اسلام قبول کرلیا۔

رئیلٹی ٹی وی سٹار، گلوکار، اداکار اور کاروباری شخصیت ڈینی لیمبو نے قبولِ اسلام کا اعلان اپنے انسٹاگرام اکاؤنٹ پر کیا اور مسجد الحرام میں عمرے کی ادائیگی کی ایک ویڈیو بھی پوسٹ کی۔

ذرائع کے مطابق ڈینی لیمبو کے اثاثوں کی مالیت ایک اندازے کے مطابق 50 ملین پاؤنڈ ہے جن میں سے زیادہ تر انہوں نے ہوٹل کے کاروبار سے کمایا ہے، صرف یہی نہیں بلکہ مہنگی ترین لیمبرگینی گاڑیوں کے مالک ہونے کی وجہ سے انہوں نے اپنا نام ڈینی کیرن سے تبدیل کرکے ڈینی لیمبو رکھا۔

انہوں نے اپنی اس ویڈیو کے کیپشن میں لکھا کہ آپ کو معلوم نہیں ہوتا کہ زندگی آپ کو کس راستے پر لے جائے گی، میں کاروبار کے سلسلے میں سعودی عرب گیا تھا مگر کام جلدی پایہ تکمیل کو پہنچ گیا اور پھر ایک ایسے شخص سے ملا جو مجھے مکہ لے گیا۔

 ڈینی لیمبو نے مزید لکھا کہ یہاں سے میرے ایک نئے روحانی اور جذباتی سفر کا آغاز ہوا۔ اب بطور نو مسلم میری لندن واپسی ہو گئی ہے۔

اداکار نے انسٹاگرام پر اپنے ’مکہ کے سفر‘ میں اپنے ایک دوست کے ساتھ تصویر شیئر کی اور لکھا شکریہ میرے بھائی باسط۔ آپ نے مجھے زندگی کے اصل معنی اور مقصد بتائے۔