بالی ووڈ کی با صلاحیت اور متنازعہ اداکارہ کنگنا رناوت نے اپنی نئی پولیٹیکل تھرلر فلم ’ایمرجنسی‘  کی ریلیز کا اعلان کر دیا گیا ہے۔

اس فلم کی تشہیر کے حوالے سے دئیے گئے ایک حالیہ انٹرویو میں اداکارہ کنگنا رناوت سے  پوچھا گیا کہ کیا وہ مستقبل میں بھارت کی وزیر اعظم بننا چاہتی ہیں؟

اس سوال پر کنگنا رناوت نے قہقہہ لگاتے ہوئے کہا کہ جلد ہی ریلیز ہونے والی فلم ’ایمرجنسی‘ کو دیکھنے کے بعد لوگ کبھی نہیں چاہیں گے کہ میں وزیر اعظم کا منصب سنبھالوں، میں صرف فلم میں وزیر اعظم بن سکتی ہوں۔

بھارتی میڈیا کے مطابق فلم ایمرجنسی  14 جون 2024 کو سینما گھروں میں نمائش کے لیے پیش کی جائے گی۔

اس فلم میں کنگنا رناوت سابق بھارتی وزیر اعظم اندرا گاندھی کا کردار ادا کر رہی ہیں جنہیں میڈم کے بجائے ’سر‘ کہا جاتا تھا۔

یہ فلم اُس وقت کی بھارتی وزیر اعظم اندرا گاندھی کی طرف سے 1975 سے 1977 تک لگائی گئی ریاستی ایمرجنسی پر مبنی ایک پیریڈ ڈرامہ ہے۔

اس سے قبل فلم کا مختصر ٹیزر جاری کیا گیا تھا ، جس میں 1971 کا دور دکھایا گیا ہے جس میں اندرا گاندھی کیلئے سابق امریکی وزیر خارجہ ہنری کسنجر کا فون آتا ہے جس میں ان کی جانب سے پوچھا گیا کہ کیا امریکی صدر رچرڈ نکسن انہیں ’سر‘ کے بجائے ’میڈم ‘کہہ کر مخاطب کر سکتے ہیں۔

کنگنا بہترین اداکاری کا مظاہرہ کرتے ہوئے اندرا گاندھی کے ہوبہو انداز میں ہاں کہتی ہیں لیکن پھر اپنے سیکرٹری کو متوجہ کر کے کہتی ہیں کہ امریکی صدرکو کہہ دینا کہ ان کے دفتر میں ہر کوئی انہیں ’سر‘کہہ کر پکارتا ہے۔

فلم ایمرجنسی کا ٹیزر دیکھیں:

واضح رہے کہ فلم ’ایمرجنسی‘ کی خاص بات یہ بھی ہے کہ کنگنا رناوت اس فلم کی ہدایتکارہ بھی ہیں اور انہوں نے اس فلم کی ہدایت کاری کو ایک ’زبردست سفر‘قرار دیا ہے۔