معروف بھارتی اداکار رتوراج سنگھ 20 فروری بروز منگل کو انتقال کر گئے ہیں۔

میڈیا رپورٹس کے مطابق اداکار کسی بیماری میں مبتلا تھے اور حال ہی میں انہیں دل کا دورہ پڑنے کے بعد اسپتال میں داخل کرایا گیا تھا تاہم، منگل کو 59 سال کی عمر میں ان کا انتقال ہوگیا۔

رتوراج کے قریبی دوست امیت بھیل نے ان کی موت کی خبر کی تصدیق کرتے ہوئے بتایا، ’’ہاں ان کا انتقال حرکت قلب بند ہونے کے باعث ہوا ہے انہیں کچھ عرصہ قبل لبلبے کے علاج کے لیے ایک اسپتال میں داخل کرایا گیا تھا تاہم ان کی آخری رسومات کے بارے میں ابھی تک تفصیلات معلوم نہیں ہیں۔

رتوراج سنگھ کو یہ رشتہ کیا کہتا ہے، کٹمب، ابھے 3 اور نیور کس یور بیسٹ فرینڈ جیسے شوز کی وجہ سے جانا جاتا ہے۔ وہ روپالی گنگولی کے سپر ہٹ شو انوپما میں بھی نظر آئے تھے۔

اس کے علاوہ انہوں نے ستیہ میو جیتے 2 اور بدری ناتھ کی دلہنیا جیسی فلموں میں بھی کام کیا۔