پاکستان شوبز انڈسٹری کی معروف اداکارہ و ماڈل نوال سعید نے کہا ہے کہ اُن کا انڈسٹری میں مرد فنکاروں کے ساتھ کام کا تجربہ اچھا رہا۔

حال ہی میں اپنے دیے گئے ایک انٹرویو میں اداکارہ نوال سعید کا کہنا تھا کہ انڈسٹری میں اداکاراؤں کے مقابلے میں مرد فنکاروں کے ساتھ کام کا تجربہ اچھا رہا۔

انہوں نے کہا کہ مرد ساتھی فنکار اپنے ساتھیوں کے ساتھ  نسبتاً بہتر رویہ اختیار کرتے ہیں کیونکہ مجھے جن چند بُرے تجربات کا سامنا کرنا پڑا وہ خواتین ساتھی فنکاروں کے ساتھ ہی پیش آئے۔

ان کا کہنا تھا کہ حال ہی میں حارث کے ساتھ کام کیا، ہم دونوں نے باہمی مشاورت کے ساتھ پراجیکٹ میں کام کیا۔ اس کے علاوہ سینیئر اداکار شہروز سبزواری اور  زاہد احمد کے ساتھ کام کرنے کا تجربہ بھی اچھا تھا۔

نوال سعید نے بتایا کہ انڈسٹری میں ابتدائی دنوں میں خواتین ساتھی اداکاراؤں کے ساتھ کام کرنا مشکل لگا، ان کے ساتھ تجربہ اچھا نہیں رہا، تاہم اب ایسا نہیں ہے۔

اداکار کے مطابق شروع کے 2 ڈراموں میں مشکل کا سامنا کرنا پڑا کیونکہ کاسٹنگ کے دوران ان اداکاراؤں نے ہدایتکاروں کو مشورے دیے کہ نوال کے علاوہ کسی اور کو کاسٹ کر لیں۔

انہوں نے مزید کہا کہ ماضی میں ساتھی اداکارائیں میرے بارے میں عجیب و غریب باتیں کرتی تھیں، میک اپ آرٹسٹ سے سوال کرتیں کہ کیا میں وگ پہنتی ہوں یا اسکن کیئر پروڈکٹس کونسے استعمال کرتی ہوں۔