بالی ووڈ فلم انڈسٹری کی مشہور و معروف اداکارہ کیرتی سینن نے کہا ہے کہ خواتین کے ساتھ کام کرنا بہت تر و تازگی کا احساس پیدا کرتا ہے۔

بھارتی میڈیا کے مطابق اداکارہ کیرتی سینن نے اپنی نئی فلم ’کریو‘ کے ٹریلر لاؤنچ کے موقع پر کہا کہ خواتین بھی بہترین کامیڈی کرسکتی ہیں۔

انہوں نے کہا کہ ہم زیادہ تر مردوں کے ساتھ کام کرتے ہیں، لیکن خواتین کے ساتھ کام کرنا بہت تر و تازگی کا احساس پیدا کرتا ہے، خواتین بھی بہت باصلاحیت ہیں جس کی سالوں سے میں معترف ہوں۔

فلم کریو کے بارے میں بات کرتے ہوئے ان کا کہنا تھا کہ جس طرح یہ فلم لکھی گئی ہے اور جس طرح اسکے کردار بنائے گئے ہیں اس تناظر میں دیکھا جائے تو فلم میں تینوں خواتین کے درمیان اچھی ہم آہنگی ہے۔

کیرتی سینن نے کہا کہ مجھے ایسا لگتا ہے کہ جب خواتین سے متعلق کوئی فلم آتی ہے تو لوگ سوچتے ہیں کہ لڑکیاں ہیں، فلم سنجیدہ ہوگی یا کوئی مدعا ہوگا، یا پھر اس میں مردوں کے خلاف بات کی جائے گی۔

اداکارہ کا کہنا تھا کہ اس فلم میں ایسا کچھ نہیں ہے، بلکہ آپ دیکھیں گے کہ خواتین بھی کامیڈی کر سکتی ہیں۔

خیال رہے کہ فلم کریو میں انکے ساتھ اداکارہ تبو اور کرینہ کپور بھی مرکزی کرداروں میں نظر آئیں گی۔