ایسا لگتا ہے کہ بگ باس کے فاتحین کے لیے مشکلات بڑھ رہی ہیں۔ ایلوش یادیو کی حالیہ گرفتاری اور بعد ازاں ضمانت پر رہائی کے بعد، بگ باس 17 کے فاتح منور فاروقی ایک قانونی مسئلے میں پھنس گئے ہیں۔

میڈیا رپورٹس کے مطابق اسٹینڈ اپ کامیڈین اور رئیلٹی ٹی وی اسٹار منور فاروقی ان 14 افراد میں شامل تھے جنہیں پولیس نے ممبئی کے ایک حقہ بار پر چھاپے کے دوران حراست میں لیا تھا۔

اس حوالے سے پولیس حکام کا کہنا ہے کہ بگ باس 17 کے فاتح منور فاروقی اور 13 دیگر کو حراست میں لیا گیا اور ان کے خلاف کل رات فورٹ کے علاقے میں ایک حقہ بار چھاپے میں مقدمہ درج کیا گیا ہے تاہم تمام ملزمان کو پوچھ گچھ کے بعد چھوڑ دیا گیا۔

خیال رہے کہ یہ پہلی بار نہیں ہے کہ منور فاروقی کو قانونی کارروائی سے دو چار ہونا پڑا ہو۔ سال 2021 میں، انہوں نے اندور سینٹرل جیل میں ایک ماہ سے زیادہ وقت گزارا تھا کیونکہ انہیں ایک کامیڈی شو کے دوران مذہبی جذبات مجروح کرنے کے الزام میں گرفتار کیا گیا تھا تاہم گرفتاری کے ایک ماہ بعد ضمانت مل گئی تھی۔