بالی ووڈ کنگ شاہ رخ خان کو انڈین پریمیئر لیگ (آئی پی ایل) کے میچ میں سگریٹ نوشی کرنا مہنگا پڑگیا ہے۔

بھارتی میڈیا کے مطابق گزشتہ روز کولکتہ کے ایڈن گارڈنز اسٹیڈیم میں سن رائزرز حیدرآباد اور کولکتہ نائٹ رائیڈرز کے درمیان آئی پی ایل 2024 کا میچ کھیلا گیا۔

اس میچ میں کولکتہ نائٹ رائیڈرز کے شریک مالک اور بالی ووڈ سپر اسٹار شاہ رخ خان نے بھی شرکت کی۔

سوشل میڈیا پر شاہ رخ خان کی چند تصاویر وائرل ہورہی ہیں جن میں دیکھا جاسکتا ہے کہ وہ میچ کے دوران ایڈن گارڈنز کے احاطے میں سگریٹ نوشی کر رہے ہیں۔

شاہ رخ خان کی یہ تصاویر جیسے ہی سوشل میڈیا پر وائرل ہوئیں تو مداحوں نے اُنہیں کڑی تنقید کا نشانہ بنایا۔

مداحوں نے کہا کہ اداکار قومی ٹی وی پر کھلے عام سگریٹ نوشی کررہے ہیں، وہ ایسا کرکے نوجوان نسل کو کونسا پیغام دے رہے ہیں؟