پاکستان شوبز انڈسٹری کے معروف گلوکار و اداکار دانیال ظفر نے کہا ہے کہ انہیں کوئی کام نہیں مل رہا اس لیے فی الحال وہ خود ڈراما اور فلم لکھ رہے ہیں۔

حال ہی میں اپنے دیے گئے ایک انٹرویو میں گلوکار و اداکار دانیال ظفر کا کہنا تھا کہ فی الحال وہ کسی دوسرے منصوبے میں کام نہیں کر رہے، البتہ وہ ایک ڈراما اور فلم لکھ رہے ہیں۔

انہوں نے کہا کہ میں نے فی الحال مذکورہ ڈرامے اور فلم سے متعلق اپنے بھائی گلوکار و اداکار علی ظفر کو بھی کچھ نہیں بتایا۔

ان کا کہنا تھا کہ انہیں کوئی کام نہیں مل رہا اور وہ کب تک کسی کردار یا پیشکش کا انتطار کرتے رہیں گے؟ اس لیے وہ خود ڈراما اور فلم لکھ رہے ہیں۔

دانیال ظفر نے ماہرہ خان کی پروڈیوس کردہ ویب اسپورٹس سیریز ’بارہواں کھلاڑی‘ سے اداکاری کا آغاز کیا تھا، اس سے قبل وہ گلوکاری کرتے دکھائی دیتے تھے۔