پاکستان شوبز انڈسٹری کے مشہور و معروف اداکار ہمایوں اشرف نے کہا ہے کہ اُن کو چھوٹی عمر میں شادی کرنے پر پچھتاوا ہے۔

حال ہی میں اپنے دیے گئے ایک انٹرویو میں اداکار ہمایوں اشرف نے بتایا کہ میں نے کبھی کسی شو میں اس حوالے سے بات نہیں کی لیکن میں اب 40 سال کا ہوں اور اب تک ایک بار شادی کرچُکا ہوں جو کہ بہت پہلے ختم بھی ہوچُکی ہے اس لیے اب جو بھی مجھ سے یہ سوال پوچھتا ہے کہ ’آپ شادی شدہ ہیں؟‘ تو میں جواب میں کہتا ہوں کہ’نہیں، میں خوش ہوں‘۔

انہوں نے کہا کہ میں ایسا نہیں کہہ سکتا کہ میری پہلی شادی کا تجربہ ناخوشگوار تھا لیکن وہ میری نادانی تھی۔

ان کا کہنا تھا کہ ضروری نہیں ہے کہ زندگی میں ہر چیز کو منفی نظریے سے دیکھا جائے بلکہ انسان اپنی زندگی میں پیش آنے والے واقعات سے سبق بھی سیکھ سکتا ہے۔

اداکار نے کہا کہ یہ بھی ضروری نہیں کہ ہر بار سامنے والے کی غلطی ہو، انسان کی اپنی غلطیاں بھی ہوتی ہیں۔

ہمایوں اشرف کا مزید کہنا تھا کہ مجھے اس بات پر پچھتاوا ہے کہ میں نے شادی کرنے میں جلدی کی مجھے اس معاملے میں جلدی کرکے اپنا وقت ضائع نہیں کرنا چاہیے تھا بلکہ پہلے اپنی پڑھائی اور کیریئر بنانے پر توجہ دینی چاہیے تھی۔