بالی ووڈ فلم انڈسٹری کے معروف گلوکار و اداکار ایوشمان کھرانہ نے اعتراف کیا ہے کہ انہوں نے ماضی میں شہرت کی بلندیوں کو چھونے کے بعد اس وقت کی گرل فرینڈ اور موجودہ اہلیہ سے بریک اپ کر لیا تھا۔

اپنے دیے گئے ایک انٹرویو میں معروف گلوکار و اداکار ایوشمان کھرانہ کا کہنا تھا کہ جب آپ صرف 16 یا 17 برس کی عمر میں ضرورت سے زیادہ شہرت حاصل کرلیتے ہیں تو اس سے ڈیل کرنا مشکل ہوجاتا ہے۔

انہوں نے بتایا کہ مجھے یاد ہے کہ 2004 میں، میں نے ریئلٹی شو ’روڈیز‘ کا سیزن 2 جیتنے کے بعد اپنی بچپن کی محبت طاہرہ کشیپ کو دھوکا دیا تھا۔

ان کا کہنا تھا کہ اس سے قبل کبھی مجھے اتنی شہرت نہیں ملی تھی، ہر لڑکی کی توجہ مجھ پر تھی، اس وقت میں چندریگڑھ کا ہیرو بن گیا تھا۔

اداکار کے مطابق اسی شہرت کے جنون میں آکر میں نے اس وقت کی گرل فرینڈ سے اس لیے رشتہ ختم کردیا کیونکہ مجھے دوسری لڑکیوں کی طرف سے توجہ حاصل ہو رہی تھی۔

ایوشمان کھرانہ نے کہا کہ میں نے طاہرہ سے یہ کہہ کر رشتہ توڑ دیا تھا کہ میں اپنی زندگی جینا چاہتا ہوں۔

انہوں نے مزید کہا کہ مجھے اپنی غلطی کا احساس 6 ماہ بعد ہوا تو میں نے طاہرہ سے معافی مانگی اور اپنا رشتہ ایک بار پھر بحال کیا۔

یاد رہے کہ ایوشمان کھرانہ اور ان کی بچپن کی محبت طاہرہ کشیپ 2008 میں شادی کے بندھن میں بندھ گئے تھے، اب اس جوڑی کے دو بچے ایک بیٹا اور ایک بیٹی ہے۔