بالی ووڈ کی معروف شخصیات عامر خان اور رنویر سنگھ کے بعد کترینہ کیف بھی ڈیپ فیک ٹیکنالوجی کا نشانہ بن گئیں ہیں۔

میڈیا رپورٹس کے مطابق بالی ووڈ سپر اسٹار کترینہ کیف ایک بار پھر ایک اور ڈیپ فیک ویڈیو وائرل ہورہی ہے جس میں انہیں ایک تقریب میں فرانسیسی زبان بولتے ہوئے دکھایا گیا ہے۔

مصنوعی ذہانت سے تیار کردہ ویڈیو میں اداکارہ کو فرانسیسی زبان میں ایک تقریب میں تقریر کرتے ہوئے دیکھا جا سکتا ہے۔

وائرل ویڈیو میں کترینہ کیف کو سینئر اداکارہ بینا کاک کے بارے میں بات کر رہی ہیں، جنہوں نے ایک فلم ‘میں نے پیار کیوں کیا’ میں اہم کردار ادا کیا تھا۔

ویڈیو کے وائرل ہوتے ہی سوشل میڈیا صارفین نے اسے اصل سمجھتے ہوئے اداکارہ کی فرانسیسی زبان میں مہارت کی تعریف بھی کی جبکہ کچھ لوگوں نے نشاندہی کی کہ یہ ویڈیو مصنوعی ذہانت کا استعمال کرتے ہوئے بنائی گئی ہے۔

دوسری جانب کترینہ کیف کے فین پیج نے وضاحت کی کہ یہ ویڈیو اصلی ہے اور اسے 2019 میں فلمایا گیا تھا جب کترینہ اور سلمان خان نے ممبئی میں بینا کاک کی کتاب کی رونمائی میں شرکت کی تھی لیکن یہ واضح کیا کہ کترینہ نے سینئر اداکارہ کے متعلق فرانسیسی نہیں انگریزی زبان میں بات کی تھی۔

اس میں کہا گیا ہے کہ مصنوعی ذہانت سے تیار کردہ ویڈیو میں کترینہ کی تقریر کا فرانسیسی ترجمہ دکھایا گیا ہے۔

ویڈیو پر تبصرہ کرتے ہوئے کچھ صارفین نے اے آئی کو “انتہائی خطرناک” قرار دیتے ہوئے کہا کہ یہ عام لوگوں سمیت مشہور شخصیات سب کے لیے خطرہ ہے۔

خیال رہے کہ نومبر 2023 میں، مصنوعی ذہانت سے تیار کردہ بھارتی اداکارہ کی کچھ غیر اخلاقی تصاویر انٹرنیٹ پر شیئر کی گئیں تھیں۔