پاکستان شوبز انڈسٹری کی مشہور و معروف اداکارہ ماہرہ خان کے گھر سے انتہائی افسوسناک خبر آ گئی ہے۔

حال ہی میں معروف اداکارہ ماہرہ خان نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر ایک اسٹوری پوسٹ کی جس میں انہوں نے اپنے مداحوں کو بتایا کہ میرے لیے یہ تصور کرنا بہت مشکل ہے کہ میرے ہینڈسم ماموں جان اب اس دنیا میں نہیں رہے۔

انہوں نے کہا کہ میں نے سُنا ہے کہ سب کے ماموں خاص ہوتے ہیں لیکن مجھے ایسا لگتا ہے کہ میرے ماموں جان سب سے زیادہ خاص تھے۔

اداکارہ نے اپنا حسین بچپن یاد کرتے ہوئے کہا کہ میرے ماموں نے مجھے سب سے خوبصورت بچپن دیا، اُنہوں نے میری نانی کو غیر مشروط محبت اور احترام دیا، اُنہوں نے میری خالہ کو باپ کی طرح پالا جبکہ وہ میری والدہ کے بھائی نہیں بلکہ اُن کی روح کے ساتھی تھے۔

ان کا کہنا تھا کہ میرے ماموں نے کبھی سخت لہجے میں بات نہیں کی، وہ ہمیشہ ہر ایک کے ساتھ شفقت سے پیش آتے تھے، وہ کبھی بھی ہمیں صبح بخیر کا میسج کرنا نہیں بھولتے تھے، وہ ہماری خوشی کی وجہ تھے۔

ماہرہ خان نے کہا کہ ماموں کو دُنیا سے رخصت ہوئے دو ہفتے ہوگئے ہیں لیکن اب بھی میرے لیے یہ تحریر کرنا مشکل ہے، یہ وقت میری سوچ سے زیادہ مشکل ہے۔

انہوں نے کہا کہ ہم آپ (ماموں) کو یاد کرتے ہیں اور ہمیشہ یاد کرتے رہیں گے، مجھے یقین ہے کہ آپ نانا اور نانی کی بانہوں میں ہوں گے اور آپ کے برابر میں آپ کا بیٹا عُمر بھی ہوگا۔

اداکارہ نے مداحوں سے اپیل کرتے ہوئے کہا کہ براہِ کرم! میرے مرحوم ماموں اکبر خان کی مغفرت کے لیے دُعا کریں۔