بالی ووڈ فلم انڈسٹری کے مشہور و معروف اداکار اکشے کمار نے کہا ہے کہ کسی بھی فلم کو ناکام ہوتے دیکھنا دل توڑنے والا ہوتا ہے۔

بھارتی میڈیا رپورٹس کے مطابق اکشے کمار کی آخری ہٹ فلم 2021 میں ریلیز ہونے والی ’سوریاونشی‘ تھی جس کے بعد سے اب تک ان کی مسلسل 10 فلمیں باکس آفس پر ناکام ہوچکی ہیں۔

ان کی مسلسل فلاپ فلموں میں ’بچن پانڈے‘، ’سمراٹ پرتھوی راج‘، ’رکشا بندھن‘، ’کٹھ پتلی‘، ’رام سیتو‘، ’سیلفی‘، ’او مائی گاڈ 2‘، ’مشن رانی گنج‘ اور ’بڑے میاں چھوٹے میاں‘ شامل ہیں۔

ایک حالیہ انٹرویو میں معروف اداکار اکشے کمار نے کہا کہ ہر فلم کے پیچھے جنون اور محنت ہوتی ہے۔

انہوں نے کہا کہ کسی بھی فلم کو ناکام ہوتے دیکھنا دل توڑنے والا ہوتا ہے، یہ چیزیں ہمیں دُکھ دیتی ہیں اور اثر انداز بھی ہوتی ہیں لیکن اس سے فلم کی قسمت نہیں بدلتی۔

ان کا مزید کہنا تھا کہ آپ کے بس میں یہ ہے کہ آپ مزید محنت کریں اور اگلی فلم میں خود کو جھونک دیں۔