سابقہ گلوکارہ رابی پیرزادہ نے کہا ہے کہ معروف ڈرامہ نگار خلیل الرحمٰن قمر صاحب کے ساتھ جو ہوا کیا پتا یہ ان کا اپنا ہی مکافاتِ عمل ہی ہو۔

حال ہی میں سابقہ گلوکارہ رابی پیرزادہ نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر اپنے جاری کردہ ایک ویڈیو بیان میں کہا کہ ڈرامہ نگار خلیل الرحمٰن قمر کے اغواء کیس میں گرفتار ملزمہ آمنہ پروفیشنل مجرم نہیں ہیں، انہیں پھنسایا جا رہا ہے، وہ پیشہ ور مجرم ہوتی تو خلیل صاحب آج زندہ نہیں ہوتے۔

انہوں نے کہا کہ خلیل صاحب کے ساتھ جو ہوا وہ غلط ہے اس کی مذمت کرتے ہیں لیکن اس میں یقیناً خلیل صاحب کی بھی کوئی نہ کوئی غلطی ہوگی جس کی وجہ سے ان کے ساتھ یہ سب ہوا۔

ان کا کہنا تھا کہ گرفتار ملزمہ پوری طرح غلط نہیں ہوگی، اگر اُس نے انہیں زندہ چھوڑا ہے تو اس کا مطلب یہ ہے کہ اس کے پاس بھی خلیل صاحب کی کوئی نہ کوئی کمزوری ہوگی، جس کی بنا پر اسے یہ یقین ہوگا کہ معاملہ پولیس میں نہیں جائے گا۔

رابی پیرزادہ نے کہا کہ گرفتار ملزمہ نے جو غلط کیا ہے، اسے اس کی سزا ضرور ملنی چاہیے لیکن جو گناہ اس نے نہیں کیا اس کی سزا نہیں ملنی چاہیے، گناہ چاہے مرد نے کیا ہو یا عورت نے دونوں کو برابر سزا ملنی چاہیے۔

سابقہ گلوکارہ کا کہنا تھا کہ پاکستان میں کبھی کسی مجرم کو سزا نہیں ملتی اور بےگناہ کو بخشا نہیں جاتا، اگر پولیس نے واقعی وہ سب برآمد کیا ہے جو انہوں نے بتایا ہے تو ایسا گروہ خلیل صاحب کو کبھی بھی زندہ نہیں چھوڑتا، کیا پتا یہ ان کا اپنا ہی مکافاتِ عمل ہی ہو۔

انہوں نے مزید کہا کہ ہم حقیقت نہیں جانتے اس لیے کسی بےگناہ کا مذاق اُڑا کر اس کے دکھ کی وجہ نہ بنیں۔