پاکستان شوبز انڈسٹری کی معروف و سینئر اداکارہ سعدیہ امام نے کہا ہے کہ شادی کو کامیاب بنانے کے لیے حالات کے مطابق سمجھوتہ کرنا ضروری ہوتا ہے۔

حال ہی میں معروف و سینئر اداکارہ سعدیہ امام نے ایک شو میں شرکت کی جس میں انہوں نے کہا کہ ایسی خواتین جن کا اپنا کامیاب کیریئر ہو تو ان کو شادی کے بعد ایک بہت غلط مشورہ ملتا ہے کہ وہ خود مختار ہیں اس لیے اُنہیں کوئی سمجھوتہ کرنے کی ضرورت نہیں ہے۔

انہوں نے کہا کہ کسی بھی شادی کو کامیاب بنانے کے لیے اپنے حالات کے مطابق سمجھوتہ کرنا ضروری ہوتا ہے ورنہ شادی کامیاب نہیں ہو سکتی۔

ان کا کہنا تھا کہ میرے والد نے مجھے شادی کے وقت یہ نصیحت کر کے رخصت کیا تھا کہ بیٹا تم اپنے سُسرال میں سعدیہ بن کر جانا سعدیہ امام بن کر نہیں، ان کے کہنے کا مطلب تھا کہ کسی بھی معاملے کو اپنی کامیابی کی وجہ سے انا کا مسئلہ نہیں بنانا۔

سعدیہ امام نے مزید کہا کہ آپ کو تھوڑا بیک فٹ پر آنا ہو گا، اپنے شوہر کو سمجھنا ہو گا، شادی کو کامیاب بنانے کے لیے یہ بہت ضروری ہے۔