بالی ووڈ کے معروف اداکار ابھیشیک نے اہلیہ و اداکارہ ایشوریا سے متعلق خوبصورت بیان دیا ہے۔

حال ہی میں معروف اداکار ابھیشیک نے اپنے ایک انٹرویو کے دوران اپنی بیٹی اور اس کی پرورش کیلئے ایشوریا کی سپورٹ پر ان کا شکریہ ادا کیا جب کہ ساتھ ہی اپنے والدین کے مصروف ترین شیڈول کے باوجود بچوں کو مکمل وقت دینے پر  ان کو سراہا۔

انہوں نے کہا کہ میں نے بچپن میں خود کو کبھی تنہا محسوس نہیں کیا، جب میں پیدا ہوا تو میری والدہ نے بچوں کی پرورش کیلئے شوبز سے دوری اختیار کرلی، دوسری طرف ہم نے کبھی بھی اپنے لیے والد کی غیر موجودگی بھی محسوس نہیں کی۔

ابھیشیک نے کہا کہ میرے گھر میں، میں خوش قسمت ہوں کہ مجھے فلموں میں کام کرنے کا موقع ملا لیکن میں یہ بھی جانتا ہوں کہ ایشوریا گھر پر آرادھیا کے ساتھ ہیں جس کیلئے میں ایشوریا کا بے حد شکر گزار ہوں۔

اداکار نے کہا کہ بطور والدین ہمارے بچے ہمیں حوصلہ دیتے ہیں، والدین اپنے بچوں کیلئے  ایک ٹانگ پر پہاڑوں پر بھی چڑھ جاتے ہیں، میں یہ بات ماؤں کے لیے بے حد احترام کے ساتھ تسلیم کرتا ہوں کیونکہ وہ جو کچھ بھی اپنے بچوں کیلئے کرتی ہیں کوئی بھی نہیں کر سکتا۔

 ابھیشیک نے کہا کہ ایک باپ اپنے بچوں کیلئے خاموشی سے سب کرتا ہے کیونکہ اسے اظہار نہیں آتا، مردوں کی یہی خامی ہے، عمر کے ساتھ بچوں کو احساس ہوتا ہے کہ ان کے باپ ان کیلئے کتنے مضبوط تھے، شاید وہ پس منظر میں رہے لیکن ان کیلئے ہمیشہ موجود رہے۔