بالی ووڈ فلم انڈسٹری کے معروف اداکار منوج باجپائی نے کہا ہے کہ مجھے اب بالی ووڈ پارٹیز میں مدعو نہیں کیا جاتا۔

بھارتی میڈٰیا کے مطابق حال ہی میں اپنے دیے گئے ایک انٹرویو میں معروف اداکار منوج باجپائی نے کہا کہ مجھے کسی سے بھی کوئی بڑا ایشو نہیں ہے لیکن  میں کسی کی پارٹی میں نہیں جاتا اور یہی وجہ ہے کہ لوگ مجھے اب مدعو بھی نہیں کرتے کیونکہ انہیں احساس ہوگیا ہے کہ میں شرکت نہیں کروں گا۔

انہوں نے کہا کہ لہٰذا دعوت کے باوجود میری غیر موجودگی انہیں ذلت اور توہین لگتی ہے اور میں اس صورتحال پر بہت خوش ہوں۔

ان کا کہنا تھا کہ برائے مہربانی مجھے کال نہ کریں کیونکہ میں رات 10 بجے تک سوجاتا ہوں اور ہمیشہ  اپنی صبح کا انتظار کرتا ہوں۔

منوج باجپائی نے کہا کہ میرے بالی ووڈ انڈسٹری میں بھی کوئی بہت سارے دوست نہیں اور نہ ہی میں زیادہ لوگوں سے ملتا جلتا ہوں۔

اداکار کا کہنا تھا کہ جو لوگ مجھے نہیں جانتے انہیں لگتا ہے کہ میں بہت مغرور ہوں لیکن ایک بار جو مجھے جان لیں تو انہیں میری عادت سمجھ آجاتی ہے۔

انہوں نے مزید کہا کہ میں ایک شکر گزار انسان ہوں لیکن میری لیے عزتِ نفس اولین ترجیح ہے اور میں اپنی رازداری کی سختی سے حفاظت کرنا پسند کرتا ہوں۔