جنوبی کوریا کے معروف اداکار پارک من جے کا انتقال ہوگیا ہے۔

جنوبی کوریا کے مشہور اداکار پارک من جے 32 سال کی عمر میں دل کا دورہ پڑنے سے چل بسے، ان کی موت کی خبر کی تصدیق اداکار کی ایجنسی ’بِگ ٹائٹل‘ نے انسٹاگرم پوسٹ میں کر دی ہے۔

پوسٹ میں ایجنسی کی جانب سے لکھا گیا ہے کہ باصلاحیت اداکار پارک من جے جنہوں نے ہمیشہ اپنے کام میں بہترین کارکردگی کا مظاہرہ کیا وہ اب اس دنیا میں نہیں رہے۔

پوسٹ میں لکھا گیا ہے کہ ہم اداکار کو مداحوں کی جانب سے ملنے والی محبت اور حمایت کی دل کی گہرائیوں سے تعریف کرتے ہیں۔

پوسٹ میں لکھا ہے کہ اگرچہ ہم اب پارک من جے کو اداکاری کرتے نہیں دیکھ سکتے لیکن ہم اُنہیں ایجنسی کے ایک قابلِ قدر اداکار کے طور پر ہمیشہ فخر سے یاد رکھیں گے۔

دوسری جانب اداکار کے چھوٹے بھائی نے اپنے سوشل میڈیا اکاؤنٹ پر ایک جذباتی پوسٹ شیئر کی ہے، جس میں لکھا ہے کہ میرے پیارے بھائی اب اس دنیا میں نہیں رہے، مجھے امید ہے کہ زیادہ سے زیادہ لوگ اُنہیں یاد رکھیں گے اور انہیں الوداع کہنے کے لیے آخری رسومات میں شرکت کریں گے۔

یاد رہے کہ اداکار پارک من جے کی آخری رسومات سیول نیشنل یونیورسٹی اسپتال میں آج ادا کی جائیں گی۔