بالی وڈ کے معروف میوزک کمپوزر و گلوکار ہمیش ریشمیا نے اپنے کامیاب فلمی کیریئر کے حوالے سے اہم باتیں شیئر کرتے ہوئے اپنے ساتھی اداکار سلمان خان اور اکشے کمار کو اپنی کامیابی کا کریڈٹ دے دیا۔

ہمیش ریشمیا نے بھارتی میڈیا کو دیے گئے ایک حالیہ انٹرویو میں اپنے کامیاب کیریئر سے متعلق گفتگو کرتے ہوئے کہا کہ سلمان خان کی مدد سے ہی میوزک انڈسٹری میں اپنا مقام ملا، سلمان بھائی نے میری موسیقی کی صلاحیتوں کو پہچان کر مجھے ایک نیا موقع دیا ورنہ میں آج سیریل پروڈیوسر ہی ہوتا۔

انہوں نے بتایا کہ والد کی تعلیم نے مجھے موسیقی سے محبت سکھائی، مگر میں اپنی صلاحیتوں کو پہچاننے میں ناکام تھا، سلمان خان نے میرے اندر چھپے میوزک کمپوزر کو پہچان کر اسے باہر نکلنے میں مدد کی جس سے میری زندگی بدل گئی اور آج ایک کامیاب میوزک کمپوزر ہوں۔

فلم ”صنم تیری قسم“ کے عنوان کی تجویز دینے کے حوالے سے ہمیش ریشمیا نے بتایا کہ ان کا اس میں بھی ایک اہم کردار تھا۔

انہوں نے ایک ہٹ فلم کے عنوان کے طور پر ”صنم تیری قسم“ کا نام تجویز کر کے اس کی کامیابی کی بنیاد رکھی ہے۔

دوسری جانب اکشے کمار کے ساتھ اپنے تعلقات پر بات کرتے ہوئے گلوکار نے کہا کہ اکشے کے ساتھ کئی کامیاب فلموں میں کام کیا، جن میں ”کھلاڑی 786“ بھی شامل ہے۔

ہمیش ریشمیا نے مزید کہا کہ اکشے کے ساتھ کام کرنے کا تجربہ بہت خوشگوار رہا اور ان کی کئی فلموں نے باکس آفس پر زبردست کامیابی حاصل کی۔