بالی ووڈ کے کنگ خان نے غریب والدین کے ایک بچے سے اتنا کامیاب انسان بننے تک کی کہانی بیان کردی۔

حال ہی میں سپر اسٹار شاہ رخ خان نے ایک شو میں اپنے بچپن کے دنوں کو یاد کرتے ہوئے بتایا کہ ہمارے گھر میں دال میں زیادہ پانی ڈالا جاتا تھا تاکہ ہم چار لوگوں کو کھانا پورا ہوسکے، اُس وقت کسی کو یہ نہیں پتا تھا کہ میں کبھی اس مقام پر پہنچ جاؤں گا۔

بالی ووڈ کے کنگ خان کا کہنا تھا کہ اگر کوئی ایسا شخص جس کی شکل و صورت اور دماغ محدود ہو، اس مقام تک پہنچ سکتا ہے تو پھر کچھ بھی ممکن ہے۔

اداکار شاہ رخ خان نے مزید کہا کہ بچپن کا دور سب سے اچھا ہوتا ہے، جب میں چھوٹا تھا تو سوچتا تھا کہ کب بڑا ہوگا اور آج جب بڑا ہوگیا ہوں تو کہتا ہوں کاش بچپن واپس لوٹ آئے۔

واضح رہے کہ بالی ووڈ کے اداکار شاہ رخ خان کے والد اور والدہ کی تعلق پشاور سے تھا اور دونوں کا جلد ہی انتقال ہوگیا تھا۔