پاکستان شوبز انڈسٹری کی معروف اداکارہ مہوش حیات نے رمضان المبارک میں عمرے کی سعادت حاصل کرلی۔

اداکارہ کی جانب سے سوشل میڈیا پر شیئر کی گئیں تصاویر اور ویڈیوز میں مہوش حیات کو ان کی بہن افشاں حیات کے ہمراہ دیکھا جاسکتا ہے۔

وائرل ہونے والی تازہ ویڈیو میں دونوں بہنوں کو عمرے کے آخری لمحات میں برکتیں سمیٹتے اور خوشیوں سے سرشار دیکھا جا سکتا ہے۔

مہوش حیات نے اپنی انسٹاگرام پوسٹ میں جذبات کا اظہار کرتے ہوئے لکھا کہ الحمدللہ! اللہ کے بے شمار فضل و کرم کا شکر ہے کہ مجھے اپنی بہن افشاں حیات کے ساتھ عمرہ ادا کرنے کی سعادت حاصل ہوئی۔

انہوں نے مزید لکھا کہ یہ سفر ہماری اللہ سے قربت کو مزید گہرا کرنے والا ثابت ہوا، جو سکون، غور و فکر اور شکر گزاری سے بھرا ہوا تھا، اللہ تعالیٰ ہمیں اپنی رحمت کے مزید قریب کر دے۔ آمین!

مہوش حیات کی عمرے کی ادائیگی کی ویڈیو سوشل میڈیا پر وائرل ہورہی ہے جس پر مداحوں کی جانب ان کے اس روحانی سفر کو سراہتے ہوئے خوشی کا اظہار کیا جارہا ہے۔

یاد رہے کہ ممکنہ طور پر یہ مہوش حیات کا اس سال کا دوسرا عمرہ ہے کیونکہ گزشتہ ماہ 26 فروری کو بھی ان کی مکہ مکرمہ میں عبادت کرتی ہوئی ایک ویڈیو سامنے آئی تھی۔