بالی ووڈ کے سُپر اسٹار عامر خان نے بالی ووڈ کے دبنگ سلمان خان کو خود سے بہتر اداکار قرار دے دیا۔

اداکار عامر خان نے کافی برسوں سے اپنے ہم عصر سلمان خان کے ساتھ کسی فلم میں کام نہیں کیا لیکن ایک انٹرویو میں دونوں نے ایک دوسرے کے بارے میں کھل کر گفتگو کی۔

سلمان خان کی فلم ’’سکندر‘‘ 30 مارچ کو ریلیز ہونے والی ہے اور اس کی پروموشنز کے دوران ایک خصوصی پروگرام ’’سکندر میٹس گجنی‘‘ میں عامر خان بھی شریک تھے۔

اس پروگرام میں دونوں اسٹارز نے اپنی پرانی یادیں تازہ کیں اور مزاحیہ جملوں سے سامعین کو محظوظ کیا۔

اس موقع پر عامر خان نے اپنے دو ٹوک انداز میں اعتراف کیا کہ سلمان خان ان سے بہتر اداکار ہیں۔

جس پر فلم سکندر کے ہدایتکار نے برجستہ کہا کہ سلمان خان جذباتی مناظر خاص طور پر رونے والے مناظر میں کافی مہارت رکھتے ہیں۔

اس پر سلمان خان نے ہنستے ہوئے جواب دیا کہ یہ سب آپ کی وجہ سے ہے، سر! میں آپ کو دیکھ کر سوچتا تھا کہ یاخدا یہ آدمی تو کمال کر رہا ہے، اس کے کندھوں پر سکندر کا بوجھ ہے، پھر اسے اپنی بیوی اور بچوں کے پاس بھی جانا ہے اور اگلے دن سیٹ پر بھی واپس آنا ہے۔ اور اس کے بعد اسے مجھے بھی برداشت کرنا پڑتا ہے۔

اداکار عامر خان نے بھی ہدایتکار کی بات کی حمایت کرتے ہوئے کہا کہ سلمان خان جذباتی مناظر بہت اچھے انداز میں فلم بند کرواتے ہیں۔

یاد رہے کہ گجنی عامر خان کی بلاک بسٹر فلم ثابت ہوئی تھی اور سلمان خان کا دعویٰ ہے کہ ان کی فلم سکندر بھی چھپڑ پھاڑ کامیابی حاصل کرے گی۔