بھارت کے نامور اداکار اور ایکشن ولن سونو سود نے اہلیہ کے حالیہ کار حادثے کے بعد سیٹ بیلٹ کی اہمیت بتادی۔

اداکار سونو سود نے اہلیہ کے کار حادثے کے چند دن بعد اپنے انسٹاگرام پر ایک اہم پیغام جاری کیا جس کے کیپشن میں انہوں نے لکھا کہ سیٹ بیلٹ نہیں تو آپ کا خاندان بھی نہیں، سیٹ بیلٹ باندھیں، چاہے آپ پچھلی سیٹ پر ہی کیوں نہ ہوں۔

ایکشن اسٹار سونو سود نے ویڈیو پیغام میں بتایا کہ گزشتہ ہفتے ناگپور میں پیش آنے والے حادثے سے کچھ لمحے قبل گاڑی میں سوار تمام افراد نے سیٹ بیلٹ باندھ لی تھی، جس کی وجہ سے وہ سب محفوظ رہے، تاہم گاڑی میں اُس وقت ان کی اہلیہ، اہلیہ کا بھتیجا اور اہلیہ کی بہن بھی موجود تھے۔

اداکار نے بتایا کہ ان کی اہلیہ نے اس حادثے سے صرف ایک منٹ پہلے ہی اپنی بہن کو سیٹ بیلٹ پہننے کا کہا تھا یعنی انہوں نے سیٹ بیلٹ پہنی اور اس کے ایک سے دو منٹ بعد ہی حادثہ پیش آگیا اور وہ اس سیٹ بیلٹ کی ہی وجہ سے بچ گئے۔

انہوں نے کہا کہ دنیا نے حادثے کے بعد ان کی گاڑی کی حالت دیکھ لی لیکن سیٹ بیلٹ نے ان کے پیاروں کی جان بچائی۔

سونو سود نے اس عام روایت کی نشاندہی بھی کی کہ اکثر لوگ، خاص طور پر پچھلی سیٹ پر بیٹھنے والے 100 میں سے 99 لوگ سیٹ بیلٹ نہیں باندھتے۔

اداکار نے اپنے پیغام کے اختتام پر عوام سے اپیل کی کہ چاہے آپ گاڑی کی پچھلی سیٹ پر ہی کیوں نہ بیٹھے ہوں مگر سیٹ بیلٹ ضرور باندھیں تاکہ آپ اور آپ کا خاندان محفوظ رہ سکے۔

یاد رہے کہ کچھ دن قبل سونو سود کی گاڑی کو ممبئی سے ناگپور ہائی پر خطرناک روڈ حادثہ پیش آیا تھا جس میں ان کی گاڑی مکمل طور پر تباہ ہوگئی تھی۔