بھارتی اداکارہ نین تارا نے کہا ہے کہ میں فلم انڈسٹری میں دوستانہ نہیں پیشہ ورانہ تعلق رکھتی ہوں۔

سماجی رابطے کی ویب سائٹ پر اداکارہ نین تارا کا ایک پرانا انٹرویو پھر وائرل ہورہا ہے جس میں انکا کہنا ہے کہ فلم انڈسٹری میں اُن کا کوئی قریبی دوست نہیں ہے۔

انہوں نے کہا کہ میں انڈسٹری میں صرف پیشہ ورانہ تعلق رکھتی ہوں، ذاتی تعلق صرف اُن لوگوں سے ہے، جنہیں میں اچھے سے جانتی ہوں۔

اداکارہ نے بتایا کہ میری زندگی میں دوستی کی بڑی اہمیت ہے، صرف 2 یا 3 لوگ ہیں جو مجھے واقعی جانتے ہیں، انہیں ہی میں اپنا سچا دوست کہہ سکتی ہوں، یہ ایسے دوست ہیں اگر مجھے کبھی کسی چیز کی ضرورت پڑی تو یہ لوگ فوراً وہاں موجود ہوں گے۔

انکا کہنا تھا کہ فلم انڈسٹری میں گہری دوستیاں بنانا اور برقرار رکھنا مشکل عمل ہے، دراصل ہر فلم کے ساتھ لوگ بدل جاتے ہیں، شوٹنگ کے بعد ہماری ملاقات کبھی کبھار ہی تقریبات میں ہوتی ہے۔

نین تارا نے مزید کہا کہ تمام ہی انڈسٹریز میں مقابلے کا ماحول ہوتا ہے لیکن فلم انڈسٹری میں یہ صحت مند نہیں، اس لیے بہتر ہے کہ آپ اپنی گزشتہ پرفارمنس سے مقابلہ کریں اور خود کو مزید بہتر بنائیں، چاہیے ایک فیصد ہی ممکن ہو۔