پاکستان کی معروف ٹک ٹاکر اور یوٹیوبر ربیکا خان نے سوشل میڈیا پر تنقید کرنے والوں کو کرارا جواب دیتے ہوئے اپنے بچپن میں بھارتی فنکاروں کے ساتھ ہونے والی ملاقات کی تصویریں شیئر کردی ہیں۔

ربیکا خان نے اپنے فوٹو اینڈ ویڈیو شیئرنگ پلیٹ فارم انسٹاگرام پر ایک پوسٹ شیئر کی جس میں انہیں اور ان کے والد معروف پاکستانی کامیڈین کاشف خان کو متعدد نامور بھارتی فنکاروں کے ساتھ دیکھا جا سکتا ہے۔

 ٹک ٹاکر ربیکا خان کی ان تصاویر میں سنجے دت، جانی لیور، امیشا پٹیل اور شاہ رخ خان سرفہرست ہیں۔

شیئر کی گئیں تصاویر کے کیپشن میں ربیکا خان نے لکھا ہے کہ ’’خاص یادیں‘‘۔

یاد رہے کہ ٹک ٹاکر ربیکا خان نے یہ تصاویر اپنے اوپر ہونے والی تنقید اور ٹرولنگ کے بعد شیئر کی ہیں۔

چند روز قبل ربیکا خان نے ایک انٹرویو میں انکشاف کیا تھا کہ میرے والد نے بھارت میں ایک کامیڈی شو کیا تھا جو بہت کامیاب ہوا، شاہ رخ خان جیسے سپر اسٹار ناصرف انہیں جانتے تھے بلکہ انہوں نے خود کہا کہ وہ میرے والد کے فین ہیں۔

تاہم اس بیان کے بعد سے ٹک ٹاکر ربیکا خان کو سوشل میڈیا پر شدید تنقید اور ٹرولنگ کا سامنا کرنا پڑ رہا تھا۔