اگر آپ یوٹیوب پر وی لاگز بناتے ہیں، ٹک ٹاک پر ڈانس یا شارٹ ویڈیوز سے لاکھوں کما رہے ہیں تو اب ہوشیار ہوجائیں! حکومتِ پاکستان آئندہ مالی سال 2025-26 کے بجٹ میں سوشل میڈیا سے ہونے والی آمدنی کو باقاعدہ ٹیکس نیٹ میں لانے کی تیاری کر رہی ہے۔

اطلاعات کے مطابق انسٹیٹیوٹ آف کاسٹ اینڈ مینجمنٹ اکاؤنٹنٹس آف پاکستان (ICMAP) نے تجویز دی ہے کہ یوٹیوب، ٹک ٹاک، فیس بک اور دیگر ڈیجیٹل پلیٹ فارمز سے حاصل ہونے والی آمدنی پر 3.5 فیصد ٹیکس عائد کیا جائے، جس کا مقصد قومی خزانے میں اربوں روپے کا اضافہ کرنا ہے۔

یہ تجویز اس وقت حکومت کی سنجیدہ مشاورت کا حصہ ہے اور امکان ہے کہ 10 جون کو پیش کیے جانے والے بجٹ میں اس کا باضابطہ اعلان کیا جائے۔

حکام کے مطابق اس اقدام سے قومی خزانے میں سالانہ 52.5 ارب روپے کی اضافی آمدن متوقع ہے۔

ماضی میں سوشل میڈیا کو محض تفریح یا اظہارِ رائے کا ذریعہ سمجھا جاتا تھا مگر حالیہ برسوں میں یوٹیوبرز، ٹک ٹاکرز اور وی لاگرز کی بڑی تعداد نہ صرف لاکھوں کی کمائی کر رہی ہے بلکہ اسے بطور پیشہ اپنانے والوں کی تعداد بھی بڑھ رہی ہے۔

اسی رجحان کو مدِنظر رکھتے ہوئے حکومت سوشل میڈیا پر مبنی آمدنی کو ٹیکس نیٹ میں لانے کے لیے حکمت عملی وضع کر رہی ہے، تاکہ ایک منظم مالیاتی نظام تشکیل دیا جا سکے۔

واضح رہے کہ پاکستان میں آن لائن مواد تخلیق کرنے والے کئی افراد ملکی اور غیر ملکی کمپنیوں کے اشتہارات اور پارٹنرشپ سے خطیر رقم کما رہے ہیں، تاہم یہ شعبہ اب تک براہِ راست ٹیکس نیٹ میں شامل نہیں تھا۔