پاکستان کی مشہور اداکارہ یمنیٰ زیدی نے ایک بار پھر اپنی زبردست اداکاری اور بےپناہ مقبولیت سے لکس اسٹائل ایوارڈ میں ایک منفرد اعزاز اپنے نام کرلیا ہے۔

ڈرامے “تیرے بن” میں “میراب” کا کردار نبھانے والی یمنیٰ زیدی کو بہترین اداکارہ کا ایوارڈ ملا، جو ان کا چھٹا لکس اسٹائل ایوارڈ ہے، اس کامیابی کے بعد یمنیٰ زیدی لکس اسٹائل ایوارڈز کی تاریخ میں سب سے زیادہ ایوارڈز جیتنے والی اداکارہ بن چکی ہیں۔

یمنیٰ زیدی نے اس اعزاز پر اپنے انسٹاگرام پر ایک جذباتی اور دل کو چھو لینے والا پیغام شیئر کیا اور چند تصاویر بھی مداحوں کے ساتھ شیئر کیں۔

انہوں نے لکس اسٹائل ایوارڈز کی ٹیم، ڈرامے کے پروڈیوسرز عبداللّٰہ کادوانی، اسد قریشی اور سب سے بڑھ کر اپنے مداحوں کا شکریہ ادا کیا، ساتھ ہی اپنے معاون اداکار وہاج علی کا بھی ذکر کیا۔

اداکارہ نے کہا کہ میراب کے ساتھ مرتسم کی موجودگی نے اس کردار کو مکمل کیا، وہاج کا شکریہ کہ اس نے مرتسم کے کردار میں اتنی خوبصورتی سے میراب کا ساتھ دیا۔

یمنیٰ زیدی نے نہ صرف اپنے فینز کا شکریہ ادا کیا بلکہ “تیرے بن” کے ناقدین کا بھی شکریہ کہا اور کہا کہ محبت دینے والوں کا دل سے شکریہ اور تنقید کرنے والوں کا بھی کیونکہ اُنہوں نے ہمیں سوچنے، بہتر کرنے اور سیکھنے کا موقع دیا۔