پاکستان کی عالمی شہرت یافتہ صوفی گلوکارہ عابدہ پروین کا انسٹاگرام اکاؤنٹ بھی بھارت میں بند کر دیا گیا، جس کے بعد مداحوں میں غم و غصے کی لہر دوڑ گئی ہے۔

بھارتی صارفین جب عابدہ پروین کے پروفائل تک رسائی کی کوشش کرتے ہیں، تو انہیں ایک پیغام موصول ہو رہا ہے جس میں کہا جا رہا ہے کہ یہ اکاؤنٹ بھارت میں دستیاب نہیں کیونکہ قانونی درخواست پر عمل کیا گیا ہے۔

اس پابندی کے بعد سوشل میڈیا پر بھارتی اور پاکستانی مداحوں کی جانب سے شدید افسوس اور ناراضی کا اظہار کیا جارہا ہے، کئی صارفین نے اس فیصلے کے اسکرین شاٹس شیئر کرتے ہوئے مطالبہ کیا ہے کہ فن اور موسیقی کو سیاسی تنازعات سے الگ رکھا جائے۔

مزید پڑھیں: بھارت میں پاکستانی اداکاروں کے سوشل میڈیا اکاؤنٹس بلاک

واضح رہے کہ یہ اقدام بھارت میں حالیہ پہلگام حملے کے بعد پاکستان اور اس کے عوام، خصوصاً اہم اور مشہور شخصیات کے خلاف بڑھتی ہوئی پابندیوں کا نتیجہ ہے، اس سے قبل بھی کئی معروف پاکستانی شخصیات کے سوشل میڈیا اکاؤنٹس کو بلاک کیا جا چکا ہے۔

اس پابندی نے دونوں ممالک کے مداحوں کے درمیان ایک نیا تنازعہ پیدا کر دیا ہے اور سوالات اٹھائے جا رہے ہیں کہ کیا سیاسی وجوہات کی بنا پر ثقافت اور فن کو قربان کیا جانا چاہیے۔