لاہور: پاکستان کے معروف گلوکار ابرار الحق نے آپریشن بنیان مرصوص کی کامیابی پر نیا ملی نغمہ جاری کر دیا ہے، جسے سوشل میڈیا صارفین کی جانب سے بے حد سراہا جا رہا ہے۔

یہ گانا ابرار الحق نے یوٹیوب پر اپنے آفیشل چینل پر ریلیز کیا، جہاں اسے اب تک 65 ہزار سے زائد بار دیکھا جا چکا ہے۔

صارفین کی جانب سے اس گانے کو حب الوطنی کا جذبہ اجاگر کرنے والا اور موجودہ حالات کی بھرپور عکاسی قرار دیا جا رہا ہے۔

یہ نغمہ ایسے وقت میں جاری کیا گیا ہے جب حالیہ دنوں میں بھارتی افواج کی جانب سے 6 اور 7 مئی کی درمیانی شب پاکستان کی سرزمین پر بلااشتعال اور وحشیانہ حملے کیے گئے۔ ان حملوں میں خواتین، بچوں اور بزرگوں سمیت 40 معصوم شہری شہید اور 121 زخمی ہوئے، جن میں 27 بچے اور 10 خواتین بھی شامل ہیں۔

جوابی کارروائی میں پاکستان کی مسلح افواج نے بھرپور جواب دیتے ہوئے بھارت کے 6 طیارے اور ڈرونز مار گرائے، جن میں فرانسیسی ساختہ جدید رافیل طیارے بھی شامل تھے۔ اس کارروائی کو پاکستان میں دفاعی کامیابی کے طور پر دیکھا جا رہا ہے۔

ابرار الحق کا یہ نیا گانا قوم کے حوصلے کو بلند کرنے اور شہداء کو خراجِ عقیدت پیش کرنے کی ایک ثقافتی کاوش کے طور پر سامنے آیا ہے۔