ہالی ووڈ کے معروف اداکار ٹام کروز کی نئی ایکشن فلم مشن امپاسیبل 8: دی فائنل ریکننگ نے امریکہ میں ریلیز سے قبل ہی 12 ملین ڈالرز کی ایڈوانس بکنگ حاصل کر لی ہے، جسے فلمی حلقوں میں ایک بڑی کامیابی قرار دیا جا رہا ہے۔

میڈیا رپورٹس کے مطابق فلم کو ابتدا میں 17 مئی کو جاپان، جنوبی کوریا، بھارت، آسٹریلیا اور نیوزی لینڈ میں ریلیز کیا گیا، جہاں اسے باکس آفس پر شاندار پذیرائی ملی۔

جنوبی کوریا میں فلم نے ویک اینڈ پر 7.5 لاکھ سے زائد ٹکٹس فروخت کیں اور 5 ملین ڈالرز کا بزنس کیا، جو رواں سال کسی بھی فلم کی سب سے بڑی اوپننگ قرار دی جا رہی ہے۔

بھارت میں اس فلم نے 4 ملین، جاپان میں 2 ملین جبکہ آسٹریلیا اور نیوزی لینڈ میں مجموعی طور پر 1 ملین ڈالرز کمائے۔

مشن امپاسیبل 8 23 مئی کو امریکہ اور دیگر ممالک میں باقاعدہ طور پر ریلیز کی جائے گی جبکہ چین میں فلم 30 مئی کو سنیما گھروں کی زینت بنے گی۔

تجزیہ کاروں کا خیال ہے کہ یہ فلم عالمی سطح پر ایک ارب ڈالرز سے زائد کمانے کی بھرپور صلاحیت رکھتی ہے۔

شمالی امریکہ میں اس فلم کے ابتدائی ویک اینڈ پر 100 ملین ڈالرز سے زائد کمائی کی توقع ظاہر کی جا رہی ہے، جو اسے رواں سال کی سب سے بڑی اوپننگز میں شامل کر سکتی ہے۔