پاکستان کی معروف سینئر اداکارہ نادیہ افگن کو فیروز خان پر تبصرہ مہنگا پڑ گیا، سوشل میڈیا پر ان کو فیروز خان کے مداحوں کی جانب سے قتل کی دھمکیاں ملنے لگی ہیں۔

اداکارہ نادیہ افگن نے حال ہی میں ایک ٹی وی پروگرام میں گفتگو کے دوران انکشاف کیا ہے کہ انہیں اداکار فیروز خان کے مداحوں کی جانب سے جان سے مارنے کی دھمکیاں موصول ہوئی ہیں۔

نادیہ افگن کے مطابق انہوں نے فیروز خان کے اداکاری کے انداز پر تنقیدی رائے دی تھی، جس کے بعد سوشل میڈیا پر کچھ مداحوں نے انہیں ہدف بنانا شروع کر دیا۔

انہوں نے بتایا کہ مجھے ایسے پیغامات موصول ہوئے جن میں لکھا تھا ’ہم تمہیں مار ڈالیں گے‘ یا ’تمہاری جان لے لیں گے‘، یہ سن کر دکھ ہوا لیکن میں اپنے کام پر پُراعتماد ہوں۔

اداکارہ کا کہنا تھا کہ یہ دھمکیاں زیادہ تر نئے اور گمنام سوشل میڈیا اکاؤنٹس سے آئیں، جنہوں نے انہیں وقتی طور پر خوفزدہ کر دیا۔

نادیہ افگن نے مزید بتایا کہ ان کے مؤقف کی بعض فنکاروں اور لکھاریوں نے حمایت کی ہے لیکن بعض سوشل میڈیا صارفین حد سے تجاوز کر رہے ہیں، جو ایک خطرناک رجحان ہے۔