پاکستان کی مشہور اداکارہ، ماڈل اور سوشل میڈیا اسٹار ہانیہ عامر نے حالیہ واقعات کے تناظر میں اپنی ذات سے منسوب بھارتی میڈیا کی خبروں کو جھوٹا اور من گھڑت قرار دے دیا۔

پاکستان کے خلاف جعلی سوشل میڈیا پوسٹ ہانیہ عامر کے نام سے وائرل ہوئی، جس نے سرحد کے دونوں اطراف عوام کو حیران کن طور پر چونکا دیا، تاہم اب انہوں نے اپنے انسٹاگرام اکاؤنٹ کی اسٹوری پر اس معاملے کی وضاحت کر دی ہے۔

اداکارہ نے لکھا کہ حال ہی میں میرے نام سے ایک بیان منسوب کیا جارہا ہے جو سوشل میڈیا پر تیزی سے پھیل رہا ہے، میں واضح طور پر کہنا چاہتی ہوں کہ یہ بیان جھوٹا ہے، میرا اس سے کوئی تعلق نہیں ہے، نہ میں ایسی باتوں کی حمایت کرتی ہوں اور نہ ہی یہ میرے نظریات کی عکاسی کرتا ہے۔

انہوں نے کہا کہ یہ ایک انتہائی حساس اور غمگین وقت ہے، اس کو سیاسی رنگ دینا اور الزامات کی سیاست کرنا صرف نفرت کو بڑھاتا ہے، ہمیں ہمدردی، انصاف اور شفا کی طرف قدم بڑھانا چاہیے۔

ہانیہ عامر نے کہا کہ بغیر کسی ثبوت کے الزام لگانا صرف نفرت پھیلانے کے مترادف ہے۔

مداحوں سے بات کرتے ہوئے اداکارہ نے مزید کہا کہ آپ کی محبت میرے لیے بے حد اہم ہے اور میں آپ سب سے محبت کے ساتھ یہ درخواست کرتی ہوں کہ کسی بھی پوسٹ کو شیئر کرنے سے پہلے اس کی سچائی کو ضرور چیک کر لیں۔

واضح رہے کہ گزشتہ دو دنوں سے بھارتی میڈیا ہانیہ عامر کا نام لے کر جھوٹی خبریں پھیلا رہا تھا، یہ سازش بھارتی عوام اور ہانیہ کے بھارتی مداحوں کو اداکارہ کے خلاف کرنے کی تھی۔

بھارتی میڈیا اپنے روایتی انداز میں ہانیہ عامر کو ملک مخالف جھوٹی پوسٹس کے ذریعے بدنام کرنے کی کوشش کر رہا تھا، جس کا ہانیہ عامر نے بھرپور جواب دیا ہے۔