معروف اداکرہ صبا فیصل نے انکشاف کیا ہے کہ خواتین کا مردوں سے برابری کا رجحان طلاقوں میں اضافے کا سبب بن رہا ہے۔

پاکستانی شوبز انڈسٹری کی معروف اداکارہ صبا فیصل نے کہا ہے کہ موجودہ دور میں طلاق کی شرح میں اضافے کی ایک بڑی وجہ خواتین کی طرف سے مردوں سے مقابلہ کرنے کا رجحان ہے۔

نجی ٹی وی کے ایک پروگرام میں گفتگو کرتے ہوئے صبا فیصل نے اس معاشرتی پہلو پر کھل کر بات کی۔

ان کا کہنا تھا کہ اللہ تعالیٰ نے مرد کو ایک فطری برتری اور ذمہ داری عطا کی ہے اور جب عورت اسی سطح پر آکر مقابلہ کرنے لگتی ہے تو رشتے میں توازن بگڑ جاتا ہے۔

یہ بھی پڑھیں: معروف بھارتی جوڑے کی علیحدگی کی خبریں زیر گردش

ان کے مطابق مرد و عورت کے تعلق میں کوئی مسابقت نہیں بلکہ سمجھوتہ، توازن اور برداشت ہونا چاہیے۔ اگر فریقین میں سے کوئی بھی اس اصول سے ہٹ جائے تو ازدواجی زندگی مسائل کا شکار ہوجاتی ہے۔

اداکارہ نے مزید کہا کہ وقت کتنا بھی بدل جائے، سماج میں کتنی ہی جدت کیوں نہ آجائے، خدا کا قانون ہمیشہ قائم رہے گا اور اس میں تبدیلی ممکن نہیں۔

ایوارڈز پر صبا فیصل کا تبصرہ

گفتگو کے دوران صبا فیصل نے ماضی کی ایک خوشگوار یاد بھی شیئر کی کہ جب وہ خبروں کی پڑھائی پر نیشنل ایوارڈ حاصل کرچکی ہیں۔

تاہم ان کا یہ بھی کہنا تھا کہ موجودہ ایوارڈ شوز میں دلچسپی ختم ہوتی جا رہی ہے کیونکہ اکثر ایوارڈز پہلے سے طے شدہ محسوس ہوتے ہیں۔ اسی لیے اب وہ ایوارڈز کی دوڑ کا حصہ بننے کی خواہش نہیں رکھتیں۔

یہ بھی پڑھیں: لڑکیوں کو کس عمر میں شادی کرنی چاہیے؟ صبا فیصل کا مشورہ

سوشل میڈیا پر متحرک

سوشل میڈیا پر صرف ایک بہو کے ساتھ تصاویر شیئر کرنے کے حوالے سے سوال پر صبا فیصل نے واضح کیا کہ یہ ان کا ذاتی فیصلہ ہے کہ کس کے ساتھ تصویر لگائیں اور اگر کسی کو ان کا انداز ناپسند ہو تو وہ بلا جھجک اَن فالو کرسکتا ہے۔

انہوں نے یہ بھی کہا کہ سوشل میڈیا سے انہیں ہمیشہ محبت ملی ہے، صرف ایک بار تنقید کا سامنا ہوا جب انہوں نے اپنی بہو سے تنازع کی بات پبلک کی تھی۔

ان کا کہنا تھا کہ چونکہ وہ کراچی میں مقیم ہیں اور ان کا خاندان لاہور میں ہے، اس لیے سوشل میڈیا ان کے لیے اپنوں سے رابطے کا ایک اہم ذریعہ بن چکا ہے۔