پاکستان شوبز انڈسٹری کی نامور اداکارہ مہوش حیات نے شادی کے حوالے سے بات کرتے ہوئے کہا کہ میں اسے ایک قسم کا جُوا سمجھتی ہوں اور اس لیے اس فیصلے میں جلد بازی نہیں کرنا چاہتی۔

معروف اداکارہ مہوش حیات نے حال ہی میں دیے گئے ایک انٹرویو میں اپنی فنی زندگی، ذاتی خیالات اور مستقبل کے ارادوں پر کھل کر بات کی۔

گفتگو کے دوران اداکارہ نے شادی کو زندگی کا اہم اور نازک فیصلہ قرار دیتے ہوئے اسے ایک طرح کا ’جُوا‘ کہا جسے وہ سوچ سمجھ کر کھیلنا چاہتی ہیں۔

مہوش حیات نے انکشاف کیا کہ مستقبل میں ہدایتکاری کے شعبے میں قدم رکھنے کی خواہش رکھتی ہوں، ڈراموں کے سیٹس پر ہدایتکاروں کے اندازِ کار کو بغور دیکھتی ہوں اور ہر باریک پہلو کو نوٹ کرتی ہوں تاکہ آئندہ اپنے منصوبوں میں ان تجربات سے فائدہ اٹھا سکوں۔

انٹرویو میں اداکارہ نے اپنے رب سے گہرے روحانی تعلق کا ذکر بھی کیا اور کہا کہ تنہائی میں اللہ سے دل کی باتیں کرتی ہوں، جو میرے لیے ذہنی سکون اور روحانی اطمینان کا ذریعہ بنتی ہیں۔

عمر کے سوال پر بات کرتے ہوئے مہوش حیات نے معاشرے کے دوہرے معیار پر تنقید کی اور کہا کہ مرد فنکاروں کو بڑھتی عمر کے باوجود نوجوان اداکاراؤں کے ساتھ کاسٹ کرنا معمول کی بات سمجھی جاتی ہے، مگر خواتین فنکاراؤں کو صرف عمر کی بنیاد پر محدود کیا جاتا ہے۔

انہوں نے اسے غیرمنصفانہ رویہ قرار دیا اور کہا کہ مغرب میں فنکار کی عمر سے زیادہ اس کی مہارت اور تجربے کو اہمیت دی جاتی ہے۔