پاکستانی شوبز انڈسٹری کی معروف اداکارہ و ماڈل ہانیہ عامر نے حج کے مقدس سفر کے دوران منیٰ سے اپنی تصاویر سوشل میڈیا پر شیئر کیں، جنہیں مداحوں اور ساتھی فنکاروں کی جانب سے بھرپور پذیرائی مل رہی ہے۔

ہانیہ عامر نے چاند رات کے موقع پر فوٹو اینڈ ویڈیو شیئرنگ پلیٹ فارم انسٹاگرام پر ایک سیلفی پوسٹ کی، جس میں وہ سیاہ عبایہ اور سر ڈھانپے ہوئے اپنی سعودی دوستوں کے ہمراہ دکھائی دے رہی ہیں۔

تصویر کی لوکیشن “منیٰ، مکہ، سعودی عرب” درج کی گئی ہے اور تمام خواتین روایتی خواتین حجاج کے لباس میں ملبوس ہیں۔

یہ تصویر حج کے دوران ہانیہ عامر کی جانب سے شیئر کی گئی پہلی پوسٹ ہے، تاہم اس سے قبل اداکارہ نے نہ تو سعودی عرب روانگی کا اعلان کیا تھا اور نہ ہی حج کرنے کے بارے میں کوئی اشارہ دیا تھا، جس کی وجہ سے ان کی یہ پوسٹ مداحوں کے لیے خوشگوار حیرت کا باعث بنی۔

اداکارہ کی اس روحانی سفر کی جھلک پر شوبز انڈسٹری کے کئی نامور فنکاروں نے مبارکباد دی، جن میں یمنیٰ زیدی، میشا شفیع، سلمیٰ حسن اور دیگر شامل ہیں۔

اس کے اگلے روز ہانیہ عامر نے ایک اور انسٹاگرام پوسٹ شیئر کی، جس میں انہوں نے عید الاضحیٰ کی مبارکباد دی اور اس پوسٹ کی لوکیشن بھی مکہ، سعودی عرب ظاہر کی گئی ہے۔

ہانیہ عامر عام طور پر اپنی روزمرہ مصروفیات اور پروجیکٹس کے حوالے سے انسٹاگرام پر متحرک نظر آتی ہیں، تاہم حج کے دوران یہ ان کی پہلی اور خاص پوسٹ تھی، جس نے سوشل میڈیا صارفین کی توجہ اپنی جانب مبذول کر لی۔