پاکستان کے معروف یوٹیوبر اور فیملی وی لاگر معاذ صفدر کی جانب سے اپنی اہلیہ صبا صفدر کو سالگرہ کے موقع پر 3 سے 4 لاکھ روپے مالیت کا گلدستہ تحفے میں دینا سوشل میڈیا پر موضوعِ بحث بن گیا۔

رواں ہفتے وائرل ہونے والی ایک ویڈیو میں ایک دیوقامت گلدستہ ٹرک پر لادا ہوا دیکھا گیا، جس نے سوشل میڈیا صارفین کو حیران کر دیا۔

بعدازاں معاذ صفدر نے اپنے وی لاگ میں انکشاف کیا کہ یہ گلدستہ انہوں نے اپنی اہلیہ کو سالگرہ کے موقع پر بطور تحفہ پیش کیا تھا، یہ ایک عام گلدستہ نہیں بلکہ ایک خاص سرپرائز تھا جس پر خاصا خرچ آیا۔

 ویڈیو میں صبا صفدر کی خوشی قابل دید تھی، تاہم گلدستے کی قیمت سن کر سوشل میڈیا پر بحث چھڑ گئی۔

کئی صارفین نے اس تحفے کو “نمائش” اور “فضول خرچی” قرار دیتے ہوئے تنقید کی، ایک صارف نے لکھا کہ یہ تحفہ بیوی کے لیے نہیں، فالوورز کو متاثر کرنے کے لیے ہے جبکہ دوسرے نے کہا کہ ایسی چیزیں نوجوانوں کے ذہنوں پر منفی اثر ڈالتی ہیں، سب کے لیے ایسی توقعات پوری کرنا ممکن نہیں۔

ایک اور تبصرہ تھا کہ ان پھولوں کی جگہ سونا دے دیتے، کم از کم سرمایہ بنتا، تاہم کچھ صارفین نے اس عمل کو مثبت انداز میں لیا اور کہا کہ اگر کوئی شخص اپنی بیوی کو خوش کرنا چاہے اور اسے افورڈ کر سکتا ہو تو یہ اس کا ذاتی فیصلہ ہے۔

یہ پہلا موقع نہیں کہ سوشل میڈیا پر شوبز یا انفلوئنسرز کی مہنگی خریداریاں یا تحفے تنقید کی زد میں آئے ہوں، اس واقعے نے ایک بار پھر یہ سوال اٹھا دیا ہے کہ آیا سوشل میڈیا پر نجی زندگی کے ایسے مظاہرے ضروری ہیں یا نہیں؟