پاکستان کے معروف اداکار ہمایوں سعید اور ماہرہ خان کی عیدالاضحیٰ پر ریلیز ہونے والی رومانوی کامیڈی فلم ’’لو گرو‘‘ کا نیا گانا “سادہ اشنا” ریلیز کر دیا گیا ہے، جو دیکھتے ہی دیکھتے سوشل میڈیا پر وائرل ہو گیا۔

’’سادہ اشنا‘‘ ایک دلکش پشتو ویڈنگ سانگ ہے جس میں نہ صرف پشتون ثقافت کی جھلک نمایاں ہے بلکہ روایتی لباس، موسیقی اور رقص بھی شائقین کو خوب بھا رہے ہیں۔

 گانے میں ماہرہ خان ایک دلہن کے روپ میں جلوہ گر ہوئیں اور ان کا روایتی انداز مداحوں کی توجہ کا مرکز بن گیا ہے۔

سوشل میڈیا پر صارفین نے گانے کو بے حد پسند کیا ہے، ایک صارف نے تبصرہ کیا کہ واہ! میں پشتون ہوں، یہ میرا کلچر ہے، اس کی شاندار نمائندگی کی گئی ہے جبکہ ایک اور صارف نے لکھا کہ یہ گانا خوشی، رنگ اور ثقافت کا حسین امتزاج ہے۔

کچھ مداحوں نے ماہرہ خان کے عروسی لک کو ان کی حقیقی شادی سے مشابہ قرار دیتے ہوئے دلچسپ تبصرے بھی کیے۔ 

واضح رہے کہ ہمایوں سعید اور ماہرہ خان کی نئی فلم ’’لو گرو‘‘ رواں برس عیدالاضحیٰ پر سینما گھروں کی زینت بنے گی جبکہ اس کے گانے پہلے ہی فلم بینوں کی توجہ حاصل کرنے میں کامیاب ہو رہے ہیں۔